Komunidade Afetadu iha Manleuana Prontu Koopera no Presiza Klareza Kona-bá Direitu ba Indemnizasaun

Mákina prezadu sobu komunidade sira-nia uma hodi halo alargamentu estarada husi diresaun Portaun Eskola Canossa nian ba Rate-Ain, Manleuana, Tersa 22 SEtembru 2026. Imajen/SEATOU

Díli 22 Setembru 2026 (RAFA)–  Xefe Aldeia Badiak, Carlos Sarmento, informa komunidade afetadu ba projetu alargamentu estrada iha Manleuana prontu koopera ho Sekretaria Estadu Asuntu Toponímia no Organizasaun Urbanasira (SEATOU), maibé komunidade afetadu mós hakarak hetan klarifikasaun kona-bá direitu indemnizasaun molok sai husi sira-nia uma.

Xefe Aldeia Badiak ba RAFA, Tersa-ne´e hatete, maski iha dezentendimentu balun husi komunidade afetadu, situasaun ne’e la’ós tanba komunidade lakohi koopera, maibé tanba sira hakarak hatene uluk sira-nia direitu no montante indemnizasaun ne’ebé sira sei simu molok husik hela sira-nia uma no sira-nia rai.

“Sira nia uma no sasan sira lori sai. Maibé buat ne’ebé sira ezije mak sira hakarak hatene uluk sira-nia direitu,” Carlos Sarmento informa  iha Manleuana.

Autoridade lokál ne´e afiram, iha balun husi uma, janela no odamatan sobu ona durante prosesu eviksaun. Situasaun ne’e, bele mós liga ho sentimentu trauma no hakfodak ne’ebé komunidade sira sente bainhira prosesu eviksaun hahú derrepente.

Xefe Aldeia subliña, komunidade la’ós kontra dezenvolvimentu iha sira nia rai. Sira prontu atu koopera ho governu, maibé hakarak atu sira-nia direitu klaru no rezolve uluk. Nune’e, sir abele iha kbiit atu halo mobilizasuan ba sira-nia sasan no bele haree fatin proriu sira aluga ka harii sira-nia uma foun.

Sekretáriu Estadu ba Toponímia no Organizasaun Urbana (SEATOU), Germano Santa Brites Dias afirma katak empreza ne’ebé responsavel ba projetu ne’e kompleta ona serbisu iha seksaun entre Elemloi no kurva besik Eskola Canossa no agora hakat ba Rate Ain.

“Empreza halo ona serbisu di’ak no agora avansa ba Rate Ain. Hafoin kurva besik Eskola Canossa, serbisu sei la’o atu nune’e estrada rua ne’e hasoru malu,” Germano Brites esplika.

Kona-bá komunidade afetadu sira, Germano Brites esplika katak, hosi indivíduu na’in-29 ne’ebé identifika, liu na’in-15 maka aseita ona termu ne’ebé aprezenta hosi Governu. Dadus kona-ba kazu sira seluk sei verifika hela.

“Semana ne’e, sira ne’ebé aseita ona sei bele asina formuláriu aseitasaun nian. Hafoin ne’e, dokumentu sira sei haruka ba autoridade finansa sira hodi nune’e bele transfere funduba sira,” nia esplika.

Sekretariu Estadu ne’e afirma katak ezijénsia sira ne’ebé maka komunidade hato’o sei hetan konsiderasaun hosi Governu maibé subliña nesesidade atu kontinua ho serbisu dezenvolvimentu nian.

Tuir dadus ne’ebé autoridade sira identifika total uma-kain hamutuk 32 iha área ne’e. Husi númeru ne’e, uma-kain 29 tama ona iha lista prosesu eviksaun. Maibé, kestaun kona-ba indemnizasaun ba uma-kain 29 ne’e seidauk klaru.

Família sira ne’ebé seidauk tama iha lista, sei iha oportunidade atu rekolla no halo verifikasaun ho governu, hodi buka dalan atu rezolve sira-nia situasaun.

Iha prosesu eviksaun ne’ebé halo iha Manleuana ne´e hetan observasaun no supervizaun husi SEATOU, Ministériu Obras Públiku (MOP), Polísia Nasionál Timor-Leste no autoridade lokál.

Jornalista: Cristina Ximenes