Komisaun E PN Rekoñese Projetu Espansaun Aeroportu Internasionál Prezidente Nicolau Lobato La’o Tarde

PT. Waskita Karya hahú ke'e área sira ne'ebé hola parte ba projetu espansaun Aeroportu Internasionál Prezidente Nicolau Lobato. Imajen/MTK

Dilí, 24 Setembru 2026 (RAFA)- Komisaun E  Parlamentu Nasionál ba asuntu Infraestrutura rekoñese projetu espansaun ba Aeroportu Internasionál Prezidente Nicolau Lobato ne´ebé ezekuta husi Empreza Estatal husi Indonézia Waskita Karya la’o tarde.

Prezidente Komisaun E , Marcos Xavier ba jornalista sira iha Parlamentu Nasionál, Kinta-ne’e haktuir, iha fulan hirak liubá komisaun E ba halo fiskalizasaun no haré katak kompaña Wakita Karya ne’ebé kaer projetu Aeroportu Internasionál Prezidente Nicolau Lobato nia prosesu la’o tarde loos

“Projetu ne’e la’o lentu duni, ami Komisaun E mós ba halo ona fisklaizasaun iha fulan tolu kotuk, ami ba haré, maibé razaun husi kompaña kaer obra referé, tanba ita iha iha Aeroportu Internasionál ida de’it, entaun aviaun loro-loron tuun, entaun sira haré espasu ne’ebé iha sira labele halo, sira atu halo dala ida de’it sei difisíl, entaun ita nia aviaun atu ba tuun iha ne’ebé,” Deputadu Marcos Xavier hateten.

Prezidente Komisaun E ne’e hatutan tempu badak Komisaun E sei ba halo tán fiskalizasaun ba projetu Aeroprtu Internasionál Prezidente  Nicolau Lobato hodi haré nia prosesu no nia persentajen.

“Sé ba fiskalizasaun mak nafatin kontinua hanesan ne’e, ami sei bolu Ministériu Transporte no Telekomunikasaun mai iha komisaun para relata, sé nia laiha kbiit atu halo ona ita bele kansela nia kontratu, ita presiza Aeroportu ne’ebé mak di’ak para aviaun mai tuun iha ita nia rai,” tenik Deputadu Marcos Xavier.

Deputadu ne’e adianta Komisaun E sei rekomenda ba Ministériu Transporte no Telekomunikasaun MTK no kompaña kaer projetu ne’e rasik atu aumenta tán traballadór sira no komisaun E husu  kompaña kaer  projetu Aeroportu Internasionál Prezidente Nicolau Lobato bele hala’o mós atividade iha kalan  nune’e obra referé bele finaliza lalais  tuir kontratu ne’ebé mak iha.

Fatin hanesan membru PN husi  Bankada CNRT Cedelizia Faria dos Santos hatutan, hanesan reprezentante povu preokupa  tanba orsamentu  fundu infraetrutura  Governu aloka tiha ona.

“Ami husu ba Ministériu tau atensaun prosesu ne’e tenke dudu lalais uituan. Ita iha kontratu ne’e ita hakerek fulan hanesan ne’e, tenke implementa, sé to’o fulan hanesan ne’e mak labele implementa fó xamada atensaun ba nia, sé nia labele implementa tuir kontratu hakerek, hapara nia ita labele, tamba fali kompaña ida de’it ita tenke atraxa prosesu dezenvolivmentu iha rai ida-ne’e,” hatete Deputada Cedelizia Faria dos Santos.

Ministeriu Transporte no Komunikasaun  (MTK) halo ona avaliasaun ba konstrusaun Aeroportu Internasional Prezidente Nicolau Lobato Comoro ne ‘ebe ezekuta husi PT Waskita Karya foin atinze 10%. ho nune ‘e, governu sei hola medida nesesariu atu garante obra ne’e remata tuir tempu ne ‘ebe determina ona.

Jornalista : Zita Menezes