Komemora Loron FALINTIL Ba Dala-51, F-FDTL ho Estudante UNTL Lao Ain husi Craras-Viqueque Ba Abu-Quelicai

Membru F-FDTL ho estudante UNTL sira sei la'o ain husi Craras-Viqueque mai Abu, Quelicai-Baucau hodi komemora loron FALINTIL ba dala-51, (20 Agostu 1975-20 Agostu 2026).

Díli, 13 Agostu 2026 (RAFA)¬-Membru FALINTIL-Forsa Defeza Timor-Leste (F-FDTL) ho estudante na’in-37 husi Universidade Nasionál Timor Lorosa’e (UNTL) halo la’o ain husi Craras-Viqueque ba Abu-Quelicai, Baucau, hodi komemora loron FALINTIL ba dala-51, 20 Agostu 1975-2026.

Marsa ho tema “Hadomi Natureza” ne’e atu fó onra ba asua’in no martir FALINTIL sira  ne’ebé selebra sira-nia loron iha tinan 2026 ho tema “Onra ba Mártir sira, Kompromisu ba Estabilidade no Dame.”

Xefe Estadu-Maior Jenerál F-FDTL, Tenente-Jenerál Domingos Raul Falur Rate Laek, iha abertura ba atividade marsa ne´e husu ba membru F-FDTL no estudante sira atu komprende no respeita istória luta FALINTIL liuhlosi fatin sira ne’ebé sei liu durante jornada.

“Imi sei la la’o iha dalan arbiru. Imi sei la’o tuir eixu estratéjiku sira ne’ebé uluk FALINTIL atravesa. Dalan ida-idak reprezenta sasukat ba esperansa sobrevivénsia no risku iminente ba mate,” h Falur Rate Laek haktuir iha Kuartel Jenerál F-FDTL, Fatuhada, Díli, Kinta-ne´e.

Tenente-Jenerál ne’e hatutan liuhosi jornada ne’e, estudante no membru F-FDTL sei iha oportunidade atu koñese rekursu naturál sira ne’ebé sustenta gerileiru sira durante tempu privasaun, identifika refújiu sira ne’ebé proteje gerileiru sira husi serku inimigu, no komprende kondisaun topográfika Timor-Leste nian.

Topografia hanesan rai lolon, rai kle’an, ai-laran no foho-lolon, tuir nia hatete, uluk sai nu’udar protesaun naturál ba gerileiru sira ne’ebé kontinua luta ho konviksaun katak Timor-Leste sei moris livre.

“Fó onra ba mártir sira la’ós de’it jestu nostáljia, maibé nu’udar memória ativa ne’ebé tau responsabilidade ba jerasaun atuál atu salvaguarda patrimóniu luta, soberania, paz no estabilidade nasaun nian,” Falur Rate Laek afirma

Tenente-Jenerál Falur Rate Laek mós husu ba membru F-FDTL no estudante sira atu uza jornada ne’e hanesan momentu atu promove protesaun natureza no apela atu labele sunu rai arbiru no labele estraga ka oho balada fuik sira, hodi hametin responsabilidade hamutuk atu proteje ambiente no rekursu naturál Timor-Leste nian.

Iha parte seluk, Vise-Reitora Assuntu Estudantil UNTL, Bia Ble Hitu Carvalho de Jesus, fó hanoin ba estudante no membru ekipa sira atu kuidadu malu durante jornada, tanba atividade ne’e sei hala’o ho distánsia ne’ebé naruk no sei enfrenta dezafiu oioin.

“Imi presiza respeita memória bainhira imi liu husi fatin ne’ebé iha memória luta no sofrimentu. Vizita fatin sira ne’e ho respeitu no espíritu atu aprende kona-bá ita nia istória. Imi presiza mantein unidade tanba imi sei la’o ho distánsia ne’ebé naruk no sei hasoru dezafiu oioin. Tenke ajuda malu, labele husik kolega ida susar mesak. Tenke apoiu malu iha dalan no transforma memória ne’e sai responsabilidade ba futuru,” Bia Ble Hitu Carvalho de Jesus hateten.

Enkuantu Inocencio Mau-Putar, nu’udar reprezentante Organizasaun ESHANA-UNTL, hato’o agradese ba F-FDTL tanba kada tinan kontinua apoia estudante UNTL atu partisipa iha programa jornada lao ain.

Nia hatete katak partisipasaun estudante sira iha atividade ne’e importante atu harii espíritu no moral juventude, liuliu atu fó ezemplu ba jerasaun foun kona-bá valoriza luta no sakrifísiu sira ne’ebé mártir no kombatente sira halo ba rai no povu Timor.

Jornalista: João Carlos