Komandu F-FDTL Sei Aplika Sansaun Ba Membru Ne’ebé Tiru Komunidade Nia Karau

Tenente Jenerál Domingos Raul Falur Rate Laek.

Díli, 14 Maiu 2026 (RAFA.tl)- Xefe Estadu Maiór Jenerál FALINTIL-Forsa Defesa Timor-Leste (F-FDTL), Tenente Jenerál  Falur Rate Laek, konfirma katak nia  simu ona informasaun no haruka ekipa sira ba iha fatin lokál krime hodi rekolla informasaun no halo relatóriu para bele aplika  medida sansaun administrativu ba membru ne’ebé tiru komunidade nia karau iha Aldeia Halik, Suku Beco, Postu Administrativu Suai, Munisípiu Covalima.

“Ne’e prosesu ona, ha’u simu informasaun primeiru kedas, iha reuniaun Estadu Maiór Jenerál nian, ha’u fó sai kedas sira ba halo investigasaun iha terenu, buka halo relatóriu para prosesa administrativamente,” Tenente Jenerál Domingos Raul Falur Rate Laek  informa hodi responde jornalista sira iha Dili, Kinta (14/05/2026).

Tenente Jenerál  konsidera membru sira nia aktu ne’e kontra regra militár nian tanba lori arma la tuir misaun no sei hola medida rigorozu atu prevene iha futuru labele akontese tan.

Nia hatutan iha vida militár ida ne’e indisiplina, sistema kontrola arma ne’e rigorozu, tenki iha autorizasaun ba utilizasaun arma mak bele, bainhira laiha ne’e labele tamba kontra lei no regra militár.

“Baibain sansaun ne’e tuir regulamentu internu F-FDTL nian, sira ne’ebé maka grave, hetan sansaun hahu husi represaun, represaun agravada, detensaun, detensaun agravada, depois prosessu disiplinar, no bele to mos prizaun.” Tenik nia.

Tuir Informasaun ne’ebé espalla iha Media Sosial katak Autoriedade Polísia balun hamutuk militár sira tiru mate komunidade nia karau hodi husik hela, tanba ne’e komunidade sira aprejenta keixa ba iha Komandu PNTL Munisípiu Covalima atu foti prosesu.

Komunidade iha Suai hein katak autoridade sira bele rezolve lalais kazu ida-ne’e atu restaura konfiansa povu ba instituisaun seguransa no garante justisa ba parte ne’ebé hetan prejuízu.

Akontesimentu ne’e iha Segunda, 11 fulan-Maiu tinan 2026, no tuir fontes sira informa katak parte sira ne’ebé tiru povu nia karau ne’e utiliza karreta ho númeru matrikula 211 bainhira husi Maliana hamutuk ho OPS halo operasaun iha Aldeia Halik.

Jornalista : João Carlos/Editór: Vito Salvadór