Komandante PNTL Hotu Tenke Hatudu Integridade no Disiplina Servisu

Formatura membru PNTL sira iha serimonia ofisiál aniversáriu PNTL ba dala-25 iha Palásiu Governu, Kinta 27 Marsu 2026. Imajen/Rafa.tl

DÍLI, 07 Abríl 2026  (RAFA.tl)– Komandante Jerál Polísia Nasionál Timor-Leste (PNTL), Komisáriu-Asistente Polísia Afonso dos Santos,  afirma ba Komandante PNTL hotu-hotu tenke hatudu integridade, disiplina no profisionalizmu iha tempu hotu iha servisu no mós iha moris loron-loron.

Notísia Relevante: Komisáriu-Asistente Afonso dos Santos Kompromete Hametin Dever no Responsabilidade PNTL iha Área Estratéjiku Lima

“Komandante ida la’ós de’it ema ne’ebé fó orden, maibé tenke sai hanesan ezemplu moris ba nia subordinadu sira. Ita nia atitude, lia-fuan no asaun loron-loron mak sai referénsia ba membru sira iha okos. Tan ne’e, komandante ida tenke hatudu integridade, disiplina no profisionalizmu iha tempu hotu, iha servisu no mós iha moris loron-loron,” Komisáriu-Asistente Afonso dos Santos hateten, Tersa (07/04/2026), iha ámbitu serimonia formatura jerál iha Kuartel Jerál PNTL.

Konisáriu-Asistente Polísia Afonso dos Santos subliña katak Komandante ne’ebé di’ak mak nia bele lori nia membru sira ho lideransa neʼebé klaru, justu no responsavel. Labele fó orden deit, maibé tenke mós fó orientasaun ne’ebé loos no akompaña implementasaun iha terrenu. Komandante ida tenke hatene katak kada orden ne’ebé nia fó, sei iha konsekuénsia direta ba seguransa, vida no konfiansa públiku.

Nia hatutan responsabilidade komandante nian la para iha tempu nia fó orden. Komandante tenke toma responsabilidade tomak ba orden sira ne’ebé nia fó, inklui rezultadu husi implementasaun iha terrenu. Se iha susesu, komandante tenke fő rekonesimentu ba nia membru sira no se iha sala, komandante tenke prontu atu simu responsabilidade no hadi’a situasaun ho loloos.

Lideransa ne’ebé forte mós presiza abilidade atu rona no komprende nia subordinadu sira. Komandante ida tenke bele halo komunikasaun ne’ebé efetivu, kria ambiente servisu neʼebé saudavel, no motiva membru sira atu halo sira nia dever ho dedikasaun no espiritu servisu. Hau hakarak subliña katak, autoridade ne’ebé ita iha hanesan komandante mak akompaña ho responsabilidade boot. Tan ne’e, Komisáriu-Asistente Polísia Afonso dos Santos, subliña uza autoridade ne’e ho loloos, ho justisa no ho sabedoria, atu asegura katak kada desizaun ne’ebé ita foti sei fó benefisiu ba instituisaun no povu tomak.

“Hau hakarak enkoraza komandante hotu atu kontinua hadi’a aan, hametin valor sira hanesan lealdade, disiplina, profisionalizmu no responsabilidade, no sai hanesan lider ne’ebé bele fó inspirasaun ba membru sira atu servisu ho di’ak liu tan. Ho lideransa ne’ebé di’ak, ita sei bele hadia instituisaun no aumenta konfiansa públiku ba PNTL,” Afonso dos Santos hateten.

Jornalista: Elio dos Santos/Editór: Vito Salvadór