Komandante Jerál PNTL Bolu Atensaun Ba Membru Sira Labele Sai Devedór

Komisáriu Assistente Polísia Afonso dos Santos lidera enseramentu parada ba seguransa Restus Mortais Preladus Katólika Na’in-haat, iha Komandu PNTL Munisípiu Díli, Segunda 14 Setembru 2026.

Díli, 14 Setembru 2026 (RAFA)- Komandante Jerál Polísia Nasionál Timor-Leste (PNTL), Komisáriu Assistente Polísia Afonso dos Santos, bolu atensaun ba membru PNTL hotu, hahú husi ajente to’o ofisiál superior sira, tenke iha responsabilidade iha jestaun finanseira pessoál no labele devedór hodi hamosu problema ba família no lori too instituisaun.

Komisáriu Assistente Polísia Afonso dos Santos hato’o deklarasaun ne´e ba membru PNTL sira durante enseramentu parada ba seguransa Restus Mortais Preladus Katólika Na’in-haat, husi Komandu PNTL Munisípiu Díli no Unidade Espesiál Polísia (UEP), Batallaun Orden Públika (BOP), ne’ebé hala’o iha Komandu PNTL Munisípiu Díli, Segunda-ne´e.

Komandante Jerál PNTL fó orden ba membru sira atu mantein disiplina no responsabilidade, liuliu kona-bá dívida ho ema seluk.

“Ha’u hato’o ba imi, sai komandante labele sai komandante devedór. Ida ne’e orden husi Komandante Jerál. Hahú husi ajente to’o leten labele sai devedór. Ha’u la autoriza mane ka feto atu deve ema nia osan iha fatin-fatin. Ha’u rona sei hasai, lamerese atu sai komandante,” Komisáriu Asistente Afonso dos Santos afirma.

Komandante Jerál PNTL ne´e hatutan, bainhira ema ida sai servidór públiku, liuliu hanesan membru Polísia, responsabilidade mak servi no proteje povu. Tanba ne’e, membru PNTL tenke evita halo dívida ho povu bain-bain ne’ebé bele hamosu problema iha komunidade.

Nia dehan, bainhira membru PNTL presiza halo empréstimu, di’ak liu atu uza instituisaun finanseira formal, hanesan banku, tuir nia kapasidade atu selu fila-fali, duke foti ka empresta osan husi povu.

“Membru PNTL tenke iha responsabilidade, labele uza pozisaun hanesan membru Polísia atu halo dívida ho povu no depois la kumpre obrigasaun atu selu,” nia afirma.

Afonso dos Santos mós orienta membru sira atu jere osan ho kuidadu, halo planeamentu finanseira no evita kompromisu finanseira ne’ebé liu sira nia kapasidade no responsabilidade finanseira.

Komandante Jerál PNTL ne´e subliña sei kontinua fó atensaun ba disiplina no étika membru sira, atu garante efetivu PNTL hala’o sira nia servisu ho profisionalizmu, integridade no responsabilidade.

Nia hateten membru PNTL hotu tenke mantein naran di’ak instituisaun no evita hahalok pesoál ne’ebé bele prejudika konfiansa públiku ba polísia.

 Jornalista: João Carlos / Juvinal Cabral