Klínika Bairru-Pité Hetan Doasaun Ambulánsia Rua husi Emprezariu ida iha Abudabhi ho Doutor Braganza

PR Ramos-Horta ho doutor Braganza entrega doasaun ambulánsia rua ba Klinika Bairru-Pité, Díli, Kurta 02 Setembru 2026.

Díli, 02 Setembru 2026 (RAFA)- Klínika Bairru-Pité, Díli, hetan doasaun ambulánsia unidade rua husi emprezáriu Ibrahim husi Abudabhi ho doutor Braganza ne’ebé entrega direita husi Prezidente Repúblika, José Ramos-Horta hodi utiliza ba atendimentu ba pasiente sira.

Xefe Estadu haktuir ba jornalista sira iha Palásiu Prezidensiál, Díli, Kuarta-ne’e katak, ambulánsia rua ne’e mai husi señór ida iha Abudabhi, nia la’ós família real, nia ema negósiu boot iha Abudabhi, nia mai Timor-Leste fulan-Setembru, tinan ida liubá mak halo desizaun hamutuk ho doutor Braganza.

“Doutor Braganza mai bei-beik Timor-Leste ona tinan 10 resin nia mai halo servisu voluntáriu, sirujia boot iha Alemaña, Inglatera, nia mai iha ne’e kleur ona, sempre halo servisu voluntáriu iha Ospitál Nasionál Guido Valadares halo operasaun ne’ebé komplikadu. Doutor Braganza mak lori señór Ibrahim nia mak deside oferese ambulánsia marka Toyota ne’ebé últimu modellu tinan ida ne’e nian. Purtantu ekipamentu emerjensia kompletu iha ambulánsia laran. Ne’e bele folin ida mill 300 USD liután, tanba karreta ne’e foun, no ekipamentu modernu,” Prezidente Repúblika, José Ramos-Horta esplika.

Xefe Estadu hateten, apoiu barak hahú mai husi Emiradus Árabes Unidus (EAU), ida  tan mak rezidénsia universitáriu ba estudante feto sira, no rona husi UEA sira mós prontu atu halo ospitál ida modernu ho espesializadu hotu-hotu. Maibé mós, sira atu loke Embaixada iha oin.

PR José Ramos-Horta esplika dala ruma  UEA mak Abudabhi Aeroportu, mais la’e, indústria boot lubuk ida, sira halo jestaun mós ba portu iha Amérika tanba, relasaun ho sira metin loos, Vise-Ministra Negósiu Estranjeiru foin mai hahú oinsá atu aumenta kooperasaun téknika.

Ramos-Horta hatetete kona-bá manutensaun ba ambulánsia ne’e espesiál ba ekipamentu médiku, se mak halo loos manutensaun ba ida ne’e, sira sei halo formasaun semana ne’e mai ne’e.

“Ha’u espera de’it governu tau matan didi’ak ba manutensaun ne’e. Tanba hanesan iha forsa armada infraestrutura oi-oin, karreta track sira ne’e, polísia nian, iha fatin hotu-hotu AC sira nunka halo limpeza, halo manutensaun, karreta estadu nian, lahalo manutensaun didi’ak, motor, ita gasta osan boot tanba la halo manutensaun,”  Xefe Estadu hateten.

Iha fatin hanesan, Doutór Braganza esplika ambulánsia ne’e la’ós transporte de’it, maibé fasilidade médiku kompletu ida ne’ebé bele lori ba fatin.

“Iha ambulánsia laran iha mákina atu haré ECG, defibriladór, infuzaun, no medikamentu barak. Nune’e ba ema ne’ebé hetan asidente iha ulun ka ain-takan, fraktura, epilepsia, asma, ka hetan atake fuan, medikamentu primeiru presiza hotu iha laran, tanba ne’e ambulánsia ne’e tenke lao hamutuk ho médiku tanba bele fó atendimentu hanesan klinika iha dalan laran,” Doutor Braganza esplika.

Doutor ne’e hatutan, entrega ambulánsia rua ne’e sai hanesan apoiu boot ba klinika Bairru-Pité hodi lori servisu saúde ba komunidade ho lalais, liu-liu ba kazu emerjensia.

Klinika Bairru-Pité sai hanesan sentru saúde referénsia iha íili ne’ebé atendimentu ba pasiente barak kada loron.

Prezidente Fundasaun Klínika Bairru-Pité, Inacio dos Santos hatete, suporta ne’ebé mai doutor Braganza la’ós foin primeira-vez, doutor Braganza servisu hamutuk klínika Bairru-Pité hahú desde 2012 mai, depois tinan 10 resin doutor Braganza servisu hamutuk klínika Bairru-Pité iha tinan rua liu ba klínika Bairru-Pité hetan doasaun husi doutor Braganza no tinan ida ne’e ita hetan suporta husi doutor Braganza liu husi doador Ibrahim, sira fó ambulansia rua hodi suporta atedimentu iha klínika Bairu Pite.

Prezidente Fundasaun ne’e esplika kona-bá manutensaun, Fundasaun Klínika Bairru-Pité mak responsabiliza, ida ne’e la’ós primeira-vez doasaun ne’ebé iha, uluk Primeriu-Ministru, Kay Rala Xanana Gusmão mós fó karreta Tritong ida ba klínika Bairru-Pité hodi manutensaun iha klínika Bairru-Pité.

Iha 2024 liu husi Minsiteriu Saúde mós tau osan sosa karreta inklui ambulánsia ida ba klínika Bairru-Pité nune’e manutensaun klínika Bairru-Pité.

Agora daudaun iha ambulánsia tolu ne’ebé iha, objetivu sosa ambulánsia ne’e tanba depois doutor Braganza vizita klínika Bairru-Pité iha ambulánsia ida de’it, dala-ruma transporta pasiente ne’ebé pozitivu TBC ba iha sentru izolamentu Tibar, fila mai direita transporta pasiente ba HNGV.

Nia afirma, ambulansia movel signifika iha ekipamentu sira ne’ebé kompletu hanesan mini klínika ida, ho ida ne’e ita ba foti pasiente la’ós tenke transporta ba fasilidade saúde mak atedimentu, maibé médiku sira bele halo atedimentu kedas iha fatin akontesimentu halo iha ambulánsia laran.

Jornalista: Cristina Ximenes