KHUNTO Husu Governu Fasilita Kartaun Eleitorál Biometriku Ba Komunidade Hotu iha Área Remota

Xefe Bankada KHUNTO, António Vedial de Sousa

Díli 5 Outubru 2026, (RAFA)-  Xefe Bankada KHUNTO, António Vedial de Sousa, liu husi deklarasaun politíka Bankada KHUNTO husu Governu atu  haruka ekipamentu biometrikú hanesan kamera, fanfrenta (sidik jari) ba iha munisípiu no  to’o iha área remota sira atu  bele fasilita sidadaun hotu asesu ba kartaun biometriku molok eleisaun Prezidensiál 2027  no eleisaun jerál 2028.

“Bankada KHUNTO husu ba Governu bele fasilita povu ne’ebé iha direitu votu, nune’e sira bele hetan kartaun biometriku hanesan kartaun billeti identidade ka kartaun eleitorál liu husi dalan ne’ebé prátiku,” Deputadu António Verdial de Sousa hateten iha plenáriu Parlamentu Nasionál, Segunda-ne’e.

Deputadu ne’e mós  husu atu Governu tau prioridade ba komunidade vulneravél sira iha área remota  sira no presiza  oferese kartaun eleitorál biometriku gratuita.

Bankada KHUNTO mós husu Komisaun Nasionál ba Eleisaun (CNE),  Sekretariadu Tékniku Administrasaun Eleitorál (STAE)  ho Ministériu Justisa no autoridade sira seluk, servisu hamutuk halo fiskalizasaun, monitorizasaun no koordenasaun ho autoridade munisípiu sira, hodi nune’e, bele garante sidadaun sira ne’ebé iha direitu ba vota bele hetan hotu kartaun eleitoral biometriku.

Hatán ba kestaun ne’e Vise-Ministru Asuntu Parlamentár, Adérito Hugo da Costa hatete Konsellu Ministru aprová ona  proposta Ministériu Administrasaun Estatál (MAE)  nian mai husi STAE  hodi hasai rezolusaun ida ba servisu reseansementu servisu eleitorál nian, inklui atualizasaun kartaun eleitorál manual ba biometriku.

“Oinsá hahú prosesu resensiamentu la’ós de’it iha rai-laran, maibé iha mós estanjeiru, obgrigatoriamente resensiamentu foun, atualiza sistema manual ba biométriku,” Adérito Hugo da Costa informa.

Reprezenta Governu ne’e hatete,  eleisaun ne’e sei  hetan mós atensaun husi komunidade internasionál sira hanesan parseiru sira bilaterál no multilateral sira hodi haré Timor-Leste nia preparasaun ba eleisaun prezidensiál 2027 no eleisaun Parlamentár 2026.

Jornalista: Zita Menezes