Kazu Oho Subar Feto Ida iha Tilomar, Autoridade Seguransa Atu Proteze Sidadaun Sira La’ós Halakon Fali Ema Nia Vida

Ministru Interiór, Francisco da Costa Guterres.

Díli, 02 Setembru 2026 (RAFA)- Ministru Interiór (MI), Francisco da Costa Guterres hateten, pessoal sira ne´ebé servisu iha instituisaun estadu liu-liu iha autoridade no instituisaun seguransa estadu nian atu proteje sidadaun sira la’ós atu halakon ema sivil nia vida.

Ministru Interior hato´o deklarasaun ne’e relasiona ho detensaun ba membru Servisu Nasionál Intelejénsia (SNI) na’in-tolu no membru Unidade Patrollamentu Fronteira (UPF) na’in-ida ne’ebé deskonfia envolve iha kazu oho  feto ida iha Tilomar, Munisípiu Covalima iha 25 Juñu 2026.

Ministru  Francisco da Costa Guterres simu ona relatoriu kona-bá membru PNTL ida   husi Unidade Patrollamentu Fronteira (UPF) ne’ebé  deskonfia envolve iha kazu oho feto ida iha área Wetaba, Tilomar, Covalima.

“Relatoriu hetan hela agora ita entrega bá iha investigasaun kriminál, investiga hotu tiha tanba prosesu ne’e krime hotu sira sei haruka ba iha Ministériu Públiku (MP) para depois prosesa no hetan Primeiru Interogatoriu (PI),”   Ministru Interiór Francisco da Costa Guterres ba jornalista sira iha Palásiu Governu, Kuarta-ne’e.

Ministru Interiór haktuir, PNTL mós sei foti desizaun kona-bá kestaun administrativu katak oinsá, kuandu submete bá iha prosesu investigasaun ne’e iha ninia prosedimentu ne’ebé mak PNTL sei foti hasoru nia membru UPF ne’e duni.

Ministru Interiór rekoñese nia simu relatoriu  mak membru UPF involve iha krime, mais nia  la simu ekipa sekretu ruma, no nia hatene iha ema balun mak hamutuk ho UPF duni.

Ministru Interiór Francisco da Costa hateten, PNTL iha Estandar Prosedimentu Operasional (SOP-sigla Inglés), nune’e sira la’o tuir de’it saida mak estabese tiha ona, ne’ebé sé mak komete krime prosesa.

“Ha’u hanoin iha membru ida ka rua  iha ne’e ita buka, ita tenke dehan katak membru polísia barak fó laran hela fó servisu hela bá rai ida-ne’e, iha ida ka rua ita tenke maibé ita ema l iha ida perfeitu,  ida ka rua ne’ebé sala foti. Tanba ne’e mak PNTL foti desizaun hodi kaptura nia ne’e sé ida-ne’e ne’e mak PNTL la foti ne’e pior liután, ita tenke louva ba PNTL,” Francisco Guterres hateten.

Membru Governu ne´e salienta, PNTL sira konsege kaer nia membru tanba deskonfia envolve iha krime, asaun ida-ne’e hotu-hotu tenke louva, tanba prosesu sira ne’e mak  atu tau Polísia iha disiplina, servisu ho loloos kuandu laloos tenke submete bá prosesu investigasaun.

Kestaun administrativu ne’e Servisu Nasionál Intelejensia no membru UPF ida-idak iha nia superior, maibé kona-bá prosesu justisa Tribunál mak sei foti desizaun tanba ne’e krime  oho ema.

“Krime ida oho ema ne’e buat ida ne’ebé loloos labele akontese, loloos ne’e membru ne’ebé servisu bá instituisaun seguransa estadu nian ne’e, tenke proteje ema, proteje sidadaun, proteje ema ne’ebé vulneravel ida-ne’e mak importante, tanba ne’e mak nia halo hasoru sira sei simu konsikoensia”, Ministru Francisco da Costa Guterres afirma.

Ministru ne´e hatete prosesu bá kazu ne’e kontinua maibé antes PNTL detein nia membru UPF, armas ne’ebé membru refere utiliza prende ona hafoin halo detensaun.

Tuir informasaun ne’ebé RAFA asesu, iha  Segunda 31  fulan-Agostu 2026,  DSIK kumpri mandadu detensaun Tribunál  Judisiál Primeira Instansia Suai hodi detein arguidu na’in-haat ne’e, no oras ne’e detein ona iha sela detensaun PNTL Komandu Munisípiu Covalima nian durante oras 72 hodi aprezenta ba Primeira Interogatóriu iha Tribunál Suai.

Kazu ne’e relasiona ho suspeita sira oho feto ida iha área Wetaba, Tilomar, Covalima, ne’ebé akontese iha fulan-Juñu 2026. Iha tempu ne’ebá públiku deskonfia feto ne’e mate tanba lafaek maka tata.

Hafoin investigasaun, autoridade hetan indísiu forte katak arguidu sira mak deskonfia envolve iha kazu oho.

Iha Kuarta-ne’e, Autpridade Seguransa sira submete ona arguido na’in-haat ne’e ba primeira interogatóriu iha Tribunál Judisiál Primeira Instásia Suai.

Jornalista: Juvinal Cabral dos Santos