Karketu Díli F.C no Assalam F.C Empata 1-1 iha Faze Dahuluk Meia-Finál Taça da Liga

Kapitaun Assalam FC ho Karketu Díli FC iha jogu faze dahuluk (Leg 1) meia-finál Taça da Liga FFTL, Domingu (15/02/2026). Imajen/Rafa.tl

DILI, RAFA.tl– Ekipa Karketu Díli F.C ho naran estimadu Matak Malirin empata 1-1 ho nia adversáriu Assalam F.C iha faze dahuluk (Leg 1) meia-finál Taça da Liga FFTL.

Notísia Relevante: Assalam F.C Promete Fó Surpreza Ba Karketu Díli F.C iha Jogu Meiu-Finál Taça da Liga

Jogu meia-finál Taça da Liga, faze dahuluk (Leg 1), entre Karketu Díli F.C ho Assalam F.C ne’ebé hala’o iha Estádiu Munisipál Díli, Domingu (15/02/2026), ekipa Matak Malirin alias Karketu Díli F.C domina liu jogu kompara ho Assalam F.C, liu-liu iha meiu kampu.

Karketu Díli F.C ne’ebé iha ambisaun forte atu sai kampiaun ba Taҫa da Liga époka ne’e, hahú halo presaun ba adversáriu Assalam F.C iha jogu ne’e, hodi domina bola iha área meiu kampu no bainhira defeza sira hetan bola soe kedas ba avansadu hodi tenta hatama golu.

Assalam F.C maske hetan presaun, maibé nafatin halo jogu ida ho kalma no disipliña iha liña defeza.  Bainhira hetan oportunidade, Assalam F.C mós kontínua kedas halo atake ba nia adversáriu no halo presaun direta ba baliza Karketu Díli F.C.

Assalam F.C hetan uluk oportunidade hodi lidera jogu ne’e hafoin jogadór Augusto da Costa marka golu ida bainhira aproveita bola kantu ne’ebé iha.

Ho golu ne’e, halo ekipa rua hasa’e liután intensidade jogu no Karketu Díli F.C halo presaun ba Assalam F.C, maibé to’o primeira parte termina, laiha mudansa ba skor iha tabela no Assalam F.C lidera provizória ho skor 1-0.

Tama ba segunda parte, Karketu Díli F.C hahú halo mudansa ba tátika no hasa’e liután intensidade jogu, inklui halo substituisaun ba liña avansadu hodi buka oportunidade atu hatama golu.

Ekipa Karketu Díli F.C kontínua lansa atake no ameasa barak ba Assalam F.C, maibé jogadór sira Assalam F.C mantein disipliña no asegura sira nia baliza husi bola ameasa sira.

Haré ba tabela Assalam F.C kontínua lidera, nune’e Karketu Díli F.C halo tan substituisaun hodi hasai defeza no aumenta avansadu atu bele buka oportunidade ba marka golu.

Substituisaun ne’ebé Karketu Díli F.C halo fó rezultadu tanba tama ba minutu 83 jogadór Daniel Gayo marka golu ida hodi halo skor hanesan 1-1 no to’o jogu termina ekipa rua mantein ho skor hanesan 1-1.

Treinadór Assalam F.C, Adu Marques Nami Ruru hatete, nia klubu konsege halo supreza iha primeiru parte ho golu dahuluk no nia konsidera golu ne’ebé halo husi Karketu Díli F.C ne’e falla husi árbitu tanba golu ne’e Karketu halo ba Assalam ne’e antes ne’e jogador Karketu tama iha liña out side.

“Ha’u hatete ona, ha’u sei halo surpreza, no realidade duni, maibé iha primeiru parte, ha’u hatete ba ha’u nia jogadór sira ne’e tenke joga di’ak  tanba ita enfrenta Karketu, klubu ne’ebé jogadór didi’ak de’it, tenke hatudu jogu ho presaun aas,  atu nune’e, primeira parte ita tenke hatama golu, no konsege hatama duni golu,” Adu Marques Nami Ruru hateten.

Iha segundu parte, tuir nia,  Assalam F.C nia ritmu tun oituan ho tatika jogu aguenta no hein kontra-atake husi Karketu Díli.

“Nu’udar treinadór, ha’u lasimu mak bola out side, no kona liman tan, maibé tanba saida mak laiña la foti desizaun,” Adu Marques Nami Ruru kestiona.

Treinadór Karketu Díli F.C,  Barnard Taye rekoñese jogu husi ekipa rua ne’e ho intenside ne’ebé aas no nia ekipa seidauk hetan oportunida di’ak, nune’e nia sei prepara di’ak liután ekipa hodi bele manan  iha jogu leg daruak hodi bele hetan tiketi ba finál Taça da Liga.

“Ida-ne’e jogu ida ne’ebé mak maka’as,  Assalam FC mai ho preparasaun di’ak.  Ami la hahú jogu ho di’ak, ami kria oportunidade barak, maibé futeból dala-ruma hanesan ne’e. Antes ne’e, ha’u hatete ona ba imi katak, ami sei marka liu golu tolu, entaun ohin sorte la’ós iha ami nia sorin, tanba ita haré ami halo ameasa barak, maibé  kona deit besi-ring, ami iha oportunidade barak, no depois jogadór sira konsege hatama de’it ho golu ida,” Bernard Taye hateten.

Tuir oráriu jogu faze daruak (leg 2), entre ekipa Karketu Díli F.C no Assalam F.C, sei joga iha Domingu,  22 dulan-Fevereiru ne’e, iha Estádiu Munisipál Díli, tuku 18:00 Otl, hodi  hadau billete ba finál Taça da Liga FFTL.

Reportajen ekipa Rafa.tl