Kandidatu Kadete PNTL Na’in-3416 Husi Díli Admetidu Ba Re-Teste iha Fulan Oin

Segundu Komandante Polísia Nasionál Timor-Leste (PNTL) Munisípiu Díli, Superintendente Polísia Luis da Silva.

Díli, 16 Setembru 2026 (RAFA)- Segundu Komandante Polísia Nasionál Timor-Leste (PNTL) Munisípiu Díli, Superintendente Polísia Luis da Silva, Kuarta-ne’e, informa totál kandidatu kadete foun PNTL Munisípiu Díli hamutuk na’in-3.416 husi na’in- na’in-3.691 admitidu atu tuir re-teste iha fulan oin, enkuantu na’in-275 la admitidu tanba dokumentu la kompletu no balun valor mak la to’o tuir rekizitu ne´ebé komisaun rekrutamentu foun hasai.

“Totál kandidatu husi Komandu PNTL Munisípiu Díli na’in-3.691, iha de’it na’in-3.416 ne’ebé admitidu, depois  na’in-275 ne’e la admitidu, ida la admitidu ne’e signifika sei la tuir teste,” Segundu Komandante PNTL Munisípiu Díli Superintendente Polísia Luis da Silva informa ba jornalista sira.

Segundu komandante PNTL Munisípiu Díli ne´e informa, lista naran kandidatu sira nian sei la taka de’it iha Komandu Munisípiu Dili, maibé mós iha eskuadra fatin lima hanesan, eskuadra Dom Aleixo, Vera Kruz, Nain-Feto, Cristo-Rei no mós Metinaro.

Nia apela ba joven sira ne’ebé hela besik Metinaro ka eskuadra seluk bele haree direta iha ne’ebá hafoin hein informasaun ba re-teste.

Nia esplika mós katak informasaun ne’ebé komandu PNTL Munisípiu Díli simu, kandidatu sira tenke hetan valor 75 ba leten mak bele pasa no bainhira valor la too elimina otomatikamente.

“Informasaun ne’ebé ami simu katak alin sira ne’ebé mak atu tuir teste nee só valor 75 ba leten mak bele pasa, entaun espera katak ita 3.000 resin ne’e sira luta oinsá para sira nia valor ne’e tama iha 75 ba leten, karik 75 mai kraik entaun ida ne’e ita elemina,” nia informa.

Superintendente Polísia ne’e hatutan kona-bá fatin no loron re-teste nian, komisaun rekrutamentu kadete PNTL mak sei fó sai. Maibé tuir informasaun teste sei hala’o iha Komisaun Funsaun Públika (KFP), bainhira mak hahú teste uluk ne’e bazeia ba naran alfabetu, baibain ne’e Aileu no Ainaro mak uluk depois mak munisípiu sira seluk tuir.

Jornalista: Juvinal Cabral /João Carlos