Ouvir RAFA Ritmo, Voz e Coração de Timor
Kandidatu kadete PNTL Munisípiu Alieu tuir prova kulturál iha Komisaun Funsaun Publika, Kinta 8 Outubru 2026.
Díli, 08 Outubru 2026 (RAFA)- Kandidatu kadete foun Polísia Nasionál Timor-Leste (PNTL) Munisípiu Aileu hahú prova kulturál ne´ebé hala’o iha Komisaun Funsaun Públika, Díli, kinta-ne’e.
Prezidente juri rekrutamentu, Komisariu Asistente Polísia José Soares, hatete ho prova kulturál ne´e marka istória foun ba PNTL tanba prova kulturál utiliza komputadór hodi garante transparente no rezultadu ne´ebé iha sei bazeia ba konesimentu no meritu ne´ebé kandidatu sira merese ba.
“La’o ba oin ne’e iha serteza, iha rezultadu ne’ebé mak di’ak bazeia ba meritu tenke iha transparansia laiha deskriminasaun fó oportunidade ba ema hotu, maubere hob buibere oan, ain tanan, ai-leba no Timor-oan hotu ne’ebé mak moris iha rai ida-ne’e nia direitu atu tuir,” hatete Komisáriu Asistente Polísia José Soares ba jornalista sira.
Prezidente Juri Rekrutamentu PNTL haktuir, valor minimu husi prova kulturál tuir diploma ministerial númeru 39/2026 ne’e 67 no karik iha teste hotu ema balun valor másimu to’o 100 ne’e nia mak okupa valor boot.
Komisaun esplika, bainhira kadete sira tuir hotu prova kulturál liu minutu lima, juri sira hatene kedas rezultadu, no ajente sira mós haré kedas ida-idak nia valor liu ka laliu iha ekran parte andár okos ne’ebé rezultadu ne’e nakloke.
Hafoin remata prova kulturál rezultadu kontinua imprime naran sira taka iha munisípiu sira durante loron lima, bainhira passa kontinua ba prova psikolojika no prova médiku maibé nafatin uza eliminatoriu.
Iha fatin hanesan, Komisária Interina Komisaun Funsaun Públika (KFP) Anita Tavares Ribeiro de Jesus hateten, sira fasilita ekipamentu ba prova kulturál ne’e atu nune’e transparansia no hili kandidatu ida ne’ebé di’ak iha rekrutamentu PNTL.
“Komisaun nia responsabilidade hotu iha prosesu ne’ebé di’ak, ita la’o hamutuk atu lori prosesu ne’e mais efisiente atu nune’e bele hetan kandidatu ne’ebé apropriadu, kapasidade para nune’e bele servisu ba instituisaun, ita iha fasilidade komputadóres 200 ida ne’e ami nia tékniku sira apropriadu sistema ne’e ami utiliza ona iha 2019 no ami hadi’a to’o ohin loron apropriadu duni,” hatete Anita Tavares Ribeiro de Jesus.
Komisáriu Komisaun Anti-Korrupsaun(CAC) Rui Pereira dos Santos esplika, prezensa iha abertura prova kulturál ne’e atu fó apoiu prosesu rekrutamentu ne’e.
” Husi CAC nia haré, nepotismu ne’e la hetan ona, tanba buat sira ne’e mosu CAC halo nia servisu ruma,” hatete Komisáriu Rui Pereira dos Santos.
Husi CAC nia observasun katak prosesu ne’e garantidu atu labele hamosu nepotismu to’o prova sira tuir mai to’o remata.
Iha prova kulturál faze primeiru (dadeer nian) kandidatu hamutuk 180 mak naran tama iha lista ba tuir prova maibé iha deit kandidatu 165 mak tuir no husi rezultadu provizoriu hatudu na’in-10 deit mak pasa ba prova psikolojika no prova médiku.
Jornalista: Juvinal Cabral /João Carlos
Written by: RafaFM
Kandidatu Kadete PNTL husi Munisípiu Aileu Hahú Prova Kulturál
todayNovember 20, 2026 13 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt