Kandidata Ba Juiz TSJ, Governu Ezonera Alexandre Corte-Real Husi KSMJ
Alexandre Corte-Real de Araújo.
Díli, 14 Setembru 2026 (RAFA) – Governu Timor-Leste ezonera Alexandre Gentil Corte-Real de Araújo, hosi kargu vogál efetivu Governu nian iha Konsellu Superiór Majistratura Judisiál (KSMJ) tanba kandidata an ba juiz iha Tribunál Supremu Justisa (TSJ).
Desizaun ne’e deside iha Reuniaun Konsellu Ministru, Sesta liubá liuhosi projetu rezolusaun Governu ne’ebé aprezenta hosi Ministru Justisa, Sérgio de Jesus Fernandes da Costa Hornai.
Alexandre Gentil Corte-Real de Araújo ba RAFA Segunda-ne’e konfirma katak nia kandidatura ba TSJ sai baze ba ezonerasaun ne’e, maski konsidera katak tuir lei laiha proibisaun ba nia atu kandidata an ba TSJ, enkuantu nafatin nu’udar vogál efetivu Governu nian iha KSMJ.
“Ha’u kandidata an ba Tribunál Supremu Justisa, Konsellu Ministru deside ona hasai ha’u hosi kargu. Maski tuir lei la bandu atu ha’u kandidata an,” Alexandre Corte-Real de Araújo hateten liuhosi telefone.
Molok desizaun ne’e, nia la simu informasaun diretamente hosi Governu kona-bá ezonerasaun ne’e, no nia hatene liuhosi televizaun.
“Ha’u rona iha televizaun de’it, sira seidauk fó koñesimentu. Maibé, desizaun tun ona, ita tenke tuir no simu tanba Governu mak deside,” Alexandre Corte-Real hateten.
Maski la konkorda ho desizaun ne’e, Alexandre hatete nia respeita no prontu atu kolabora ho desizaun Governu.
Rekorda katak, iha reuniaun loron 11 fulan Setembru ne’e, Konsellu Ministru aprova mós projetu Rezolusaun Governu kona-ba nomeasaun Nelinho Vital nu’udar substitutu Alexandre Gentil Corte-Real, hodi assume kargu vogál efetivu Governu nian iha KSMJ ba mandatu tinan haat.
KSMJ iha responsabilidade atu jere no superviziona aspetu dixiplinár iha atividade majistradu judisiál sira, inklui prosesu nomeasaun, kolokasaun, transferénsia no promosaun juízes iha Timor-Leste.
KSMJ prezide hosi Juiz Prezidente Tribunál Supremu Justisa no kompostu hosi vogál na’in-haat, inklui ida ne’ebé Governu nomeia.
Jornalista: Cesarina de Carvalho
Notícias Populares
PM Xanana Hatun Despaixu Suspende Permanente PAM Aileu João Bosco dos Santos
Membru PNTL Ida Tiru Nia Kaben Ne’ebé ho Kondisaun Isin-rua
Komandu Jerál F-FDTL Detein Membru Polísia Militár Ne’ebé Envolve iha Dezentendimentu ho SEATOU
Deskonfia, Kandidatu Ajente PNTL ho Inisiál JGCM Laiha Diploma Sekundáriu Pasa Ba Teste Médiku
Prezidente Filipina Telefone Xanana Husu Kansela Apóiu Umanitáriu
Sé maka ita
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Kontaktu sira
- +67077072012
- Avenida Presidente Nicolau Lobato, Colmera,Dili, Timor Leste
- rafa103.5fm@gmail.com