Kada Tinan CVTL Hetan Fundu Husi Governu Millaun Rua USD Hodi Fó Apoiu Umanitária

Assembleia Nasionál CVTL ba dala-VI períodu 2026-2030, Sesta 14 Agostu 2026.

Díli 14 Agostu 2026 (RAFA) –Kada tinan Governu apoiu fundu millaun rua USD ba  Kruz  Vermella Timor-Leste  (CVTL, sigla portués) hodi fó apoiu umanitáriu  ba komunidade ne’ebé durante ne’e afetadu husi dezastre naturál.

Apoiu ne’ebe CVTL  fó tuir nesesidade no nivel dezastre hanesan  tulun ne’ebe sira  fó  ba komunidade afetadu iha Ainaro, Manufahi, Suai no área remota sira seluk.

Prezidente Konsellu Diretivu Nasionál CVTL, Madalena Mello Hanjam Costa Soares,  hateten sira kontinua fó apoiu umanitáriu ba komunidade sira ne’ebé afetadu husi dezastre naturál iha situasaun konflitu no emerjénsia sira, tantu iha Timor-Leste no mós iha rai-li’ur.

“CVTL mós hetan apoiu finanseiru husi Governu Timor-Leste ho montante millaun rua USD kada tinan, no liu husi mobilizasaun rekursu internasionál, durante nia mandatu, CVTL konsege mobiliza apoiu entre  millaun haat USD to’o millaun neen USD,” Prezidente Konsellu Diretivu Nasionál CVTL, Madalena Mello Hanjam Costa Soares hateten iha  ámbitu Assembleia Nasionál CVTL ba dala-VI períodu 2026-20230 ne’ebé hala’o Sesta-ne’e, iha Díli.

Madalena Hanjam  hatutan iha situasaun difisil, inklui kalamidade naturál no konflitu armadu, CVTL halo servisu bazeia ba prinsipiu no lei umanitáriu internasionál. Apoiu ne’e la limita de’it ba Timor-Leste, maibé CVTL mós partisipa iha esforsu solidariedade internasionál, inklui ba vítima dezastre iha Filipina, Myanmar no Indonézia.

Durante nia mandatu, eventu boot sira ne’ebé CVTL partisipa no kontribui ba resposta umanitária inklui pandemia COVID-19, vizita Papa Francisco no dezastre naturál oioin.

CVTL nia forsa voluntáriu sira  besik 4.000  ne’ebé kompostu husi munisípiu hotu. Iha opurtunidade ne’e  CVTL hato’o mensajen solidariedade ba Kolómbia, ne’ebé hasoru dezastre rai-nakdoko maka’as ne’ebé rezulta iha ema liu 250 lakon vida.

Iha área saúde no resposta emerjénsia, CVTL kontinua fó servisu primeiru sokoru ba ema hotu ne’ebé presiza. Iha tempu hanesan, CVTL mós iha servisu komersiál primeiru sokoru ba entidade ka ema sira ne’ebé presiza no uza sira-nia orsamentu rasik.

CVTL mós kontribui iha área bee moos no seguransa saúde liuhusi projetu sira iha komunidade.

Durante ne’e, projetu liu 400 tama iha CVTL, no liu 200  konsege implementa, liuliu iha área remota sira, atu hadi’a asesu komunidade ba bee-moos.

CVTL mós kontinua fó atensaun ba mobilizasaun doasaun ran atu ajuda garante disponibilidade ran ba nesesidade iha ospitál sira.

Madalen Hanjam mós relata kona-bá polítika bázika ne’ebé CVTL halo armonia polítika, estratéjiku Krus Vermella nian rasik, depois buka osan no halo enkontru kooperasaun, mantein kontrolu ho parseiru hotu-hotu, liuliu ho Governu to’o hetan ona orsamentu atu responde  atividade ka nesesidade operasionál nian.

Jornalista: Cesarina de Carvalho