Noticias

Janeiru-Outubru, PNTL Díli Prende Karreta-Motór Hamutuk 1.913

todayNovember 16, 2026 60

Background
share close

Díli, 16 Novembru 2026 (RAFA)- Komandante Polísia Nasionál Timor-Leste (PNTL) Munisípiu Díli, Komisáriu Asistente Polísia Orlando Gomes, hatete hahú husi fulan-Janeiru to’o fulan-Outubr,u tinan ne´e, Komandu Polísia Díli, prende karreta no motór hamutuk 1.913 tanba dokumentu la kompletu no viola regulamentu tráfiku, inklui barak mak laiha asesoriu hanesan espellu no sapa matrikula.

“Iha operasaun ne’ebé ami hala’o durante loron no kalan, hahú husi fulan-Janeiru to’o fulan-Outubru, ami prende karreta no motór hamutuk 1.913,” Komandante PNTL Munisípiu Díli, Komisáriu Asistente Polísia Orlando Gomes, ba jornalista sira iha Komandu PNTL Munisípiu Díli, Segunda-ne´e.

Dokumentu karreta no motór ni’an hamutuk 1.668 no infrasaun violasaun Kódigu Tráfiku, la uza asesóriu no plat hamutuk 3.290.

Polísia mós prende karreta Governu hitu  no motór Governu 13. Motór ilegal ne’ebé laiha dokumentu hamutuk 56.

“Motór ilegal sira ne’e ami prosesa ona iha Ministériu Públiku, no Tribunál hatún desizaun ba kada motór atu selu multa US$150 iha banku,” hatete Komisáriu Asistente ne´e.

Nia esplika Komandu PNTL Díli servisu hamutuk ho Diretoria Nasionál Transportes Terrestres (DNTT)  trata dokumentu motór ilegal hamutuk 56 no husi total motór sira-ne’e, trata ona motór 39 nia dokumentu, enkuantu motór 17 seluk seidauk kompleta no sei kontinua iha kontrolu Komandu PNTL Díli.

Komandante ne´e esplika ojetivu husi operasaun ne’e atu identifika veíkulu sira ne’ebé la kumpre regulamentu tráfiku, inklui dokumentu veíkulu, lisensa kondusaun no kondisaun téknika veíkulu nian, hodi prevene infrasaun no asidente iha estrada.

Komandante PNTL Díli mós apela ba komunidade, liuliu motorista sira atu kumpre regulamentu tráfiku, kompleta dokumentu veíkulu nian no uza ekipamentu seguransa durante kondusaun.

Atu tama ba preparasaun selebrasaun Natal no Tinan-Foun, Komandu PNTL Díli sei aumenta volume operasaun no kontrolu tráfiku, inklui pasa revista ba veíkulu sira, Para hametin kontrolu iha pontu estratéjiku sira no hala’o operasaun regulár atu asegura katak kondutór sira kumpre lei no regulamentu tráfiku.

Jornalista: João Carlos

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!