Janeiru-Agostu, Servisu Migrasaun Rejista Sidadaun Estranjeiru 282.304 Tama Timor-Leste

Diretór Ezekutivu Servisu Migrasaun, Komisariu Asitente Polísia Jorge Monteiro.

Díli, 17 Setembru 2026 (RAFA)- Diretór Ezekutivu Servisu Migrasaun (SM) Komisáriu Asistente Polísia Jorge Monteiro informa, durante períodu fulan-Janeiru to’o fulan-Agostu 2026, totál sidadaun estranjeiru ne’ebé tama mai territóriu nasionál hamutuk 282.304 husi nasaun 198, no kontribui reseita ba kofre Estadu ho montante US$2.945.350,00.

Iha distribuisaun sidadaun estranjeiru tama kada fulan hanesan fulan-Janeiru hamutuk 34.012, Fevereiru (27.364), Marsu (31.739), Abríl (34.895), Maiu (35.917), Juñu (40.302), Jullu (42.017), no fulan-Agostu hamutuk 36.058.

Sidadaun estranjeiru sira-ne’e mai husi nasaun hamutuk 198, no iha lista nasaun ho númeru ema  tama  aas liu, Indonézia okupa pozisaun primeiru ho total 82.193, tuir República Popular Xina 11.340, Austrália (7.312), Portugal (6.236), no Filipina (1.682), Estados Unidu  Amérika (1.640), Malázia (1.499), Índia (1.439), Japãun (1.247), no Singapura (1.083).

Enkuantu ba lista  nasaun sira seluk, Reinu Unidu rejista 887, Vietnam (728), Koreia du Súl (608), Nova Zelándia (428), Alemaña (405), Fransa (402), Rússia (184), Israel (60), Repúblika Islámika Irán (12), no Turquia (11).

Servisu Migrasaun rejista mós sidadaun estranjeiru hamutuk 288.624 ne’ebé sai hosi territóriu nasionál Timor-Leste.

“Relasiona ho emisaun vistu ne’ebé Servisu Migrasaun  hasai ka emite 135.170 ne’e periodu Janeiru to’o Agostu. Depois ita hasai vistu traballu ba ema estranjeiru iha kategoria emisaun hamutuk na’in 392.600, vistu traballu renovasaun 201.100, vistu negósiu klase II 4.350, vistu temporária 46.550, fixasaun rezidensia 2.050, vistu autorizasaun rezidénsia 120.000”, Diretor Ezekutivu  Servisu Migrasaun (SM) Komisáriu Asistente Polísia Jorge Monteiro, informa ba jornalista sira iha, Díli, Kinta-ne’e.

Ba sidadaun estranjeiru ne’ebé suspeitu komete krime burla informátika no tama iha prosesu judisiál, Servisu Migrasaun simu ordem hosi Tribunál Judisiál Primeira Instánsia Dili (TJPID) atu bandu sira sai hosi territóriu nasionál.

Total sidadaun estranjeiru ne’ebé sujeitu ba ordem tribunál ne’e hamutuk 132, kompostu husi sidadaun Repúblika Popular Xina na’in-79  no Repúblika Indonézia  na’in-57.

Komisariu Asistente Polísia Jorge Monteiro hateten katak, medida ne’e aplika tanba sidadaun estranjeiru sira refere sei iha prosesu judisiál no presiza kontinua enfrenta prosesu tuir lei iha Timor-Leste. No Servisu Migrasaun mos aplika rekuza entrada ba sidadaun estranjeiru hamutuk na’in-82.

“Ita aplika rekuza entrada tama iha territóriu nasionál Timor-Leste tanba rekezitu atu tama iha Timor-Leste ne’ebé sira la priense nune’e, entre periodu Janeiru to’o Agostu 2026 ita halo rekuza entrada ba sidadaun hamutuk 82 atu tama iha teritóriu Nasionál Timor-Leste”, Diretór Ezekutivu Servisu Migrasaun informa.

Rekuza entrada aplika ba ema sira ne’ebé la kumpre rekizitu atu tama iha territóriu nasionál, haruka fila kedas iha pontu entrada sira, bainhira autoridade migrasaun halo verifikasaun ba dokumentu viajen no rekizitu sira iha pontu entrada terrestre, portu no aeroportu.

Aleinde ne’e Servisu Migrasaun mós hala’o medida administrativa ba sidadaun estranjeiru sira ne’ebé viola kondisaun vistu ka hela ilegalmente iha territóriu nasionál, liuhosi expulsaun administrativa no prosedimentu abandona voluntáriu territóriu nasionál.

Nia subliña katak diseminasaun informasaun kona-bá dadus no atividade migrasaun ne’e importante atu fó komprensaun ba públiku kona-ba movimentu sidadaun estranjeiru tama no sai husi Timor-Leste no implementasaun kontrolu migrasaun tuir lei.

Nune’e mós husi Servisu Migrasaun nian kontribui reseita ba kofre Estadu hahú husi períodu fulan-Janeiru to’o fulan-Agostu, tinan ne’e, ho montante US$ 2.945.350,00.

Jornalista: Juvinal Cabral dos Santos