Janeiru-Agostu, PNTL Díli Rejista Kazu Krime 1.087

Komandante Polísia Nasionál Timor-Leste (PNTL) Munisípiu Díli, Komisáriu Asistente Polísia Orlando Gomes.

Díli, 21 Agostu 2026 (RAFA) – Komandante Polísia Nasionál Timor-Leste (PNTL) Munisípiu Díli, Komisáriu Asistente Polísia Orlando Gomes, informa durante fulan-ualu, husi fulan-Jeneiru to’o fulan-Agostu ne’e, Polísia Munisípiu Díli rejista kazu krime hamutuk 1.087.

Husi númeru ne´ebé iha krime ne’ebé akontese barak liu mak ofensa ba integridade fizika simples, violénsia doméstika no furtu simples.

“Kazu krime ne’ebé akontese hahu husi Janeiru to’o fulan Agostu hamutuk 1.087. Entre kazu 1.087 ne’e, kazu aas liu mak ofensa ba integridade fizika simples, violénsia doméstika no furtu simples,” Komandante PNTL Munisípiu Díli, Komisáriu Asistente Polísia Orlando Gomes inform aba jornalista sira, Sesta-ne’e.

Komisáriu Asistente Polísia Orlando gomes haktuir bazeia ba observasaun polísia, balun husi kazu sira ne’e akontese tanba konsumu alkóliku, problema kondisaun ekonomia no konflitu ne’ebé hahú liuhosi media sosiál.

Komandante  Polísia Munisípiu Díli ne´e hatutan durante períodu Janeiru to’o Agostu, autoridade polísia kontinua simu no rejista relatóriu kona-bá kazu krime iha área jurisdisaun Munisípiu Díli, no halo investigasaun tuir prosedimentu ne’ebé aplika.

Iha parte seluk, Seksaun Investigasaun Kriminál PNTL Munisípiu Díli simu delegasaun kompeténsia husi Ministériu Públiku hamutuk  kazu 2.064. Husi númeru ne’e, polísia ezekuta ona delegasaun kompeténsia ba kazu 58, enkuantu kazu 106 sei iha prosesu no sei ezekuta iha tempu besik.

Komandante PNTL Munisípiu Díli mós hatete atu hamenus númeru krime, PNTL kontinua halo sensibilizasaun ba komunidade no aumenta patrullamentu no operasaun tama-sai iha bairru sira.

Komisáriu Asistente  Polísia Orlando Gomes halo komparasaun katak iha tinan kotuk ho tinan ne´e númeru krime tun uitoan tanba iha koordenasaun no vijilansia másimu husi autoridade seguransa hamutuk ho komunidade sira hodi halo prevensaun ba konflitu iha munisipiu Díli.

Jornalista: João Carlos / Juvinal Cabral dos Santos