Ouvir RAFA Ritmo, Voz e Coração de Timor
Vise-Primeiru-Ministru no Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino entrega prenda ba Embaixadór Israel mai Timor-Leste, Yahel Vilan, Kuarta 18 Novembru 2026.
Díli, 18 Novembru 2026 (RAFA)- Embaixadór Israel mai Timor-Leste, Yahel Vilan, manifesta interese atu hametin no dezenvolve kooperasaun bilateral entre Israel no Timor-Leste, liuliu iha setor agrikultura, edukasaun no defeza.
Embaixadór Israel Yahel Vilan, manifesta interese ne’e bainhira hasoru malu ho Vise-Primeiru-Ministru no Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino iha Palásiu Governu, Kuarta-ne’e .
Iha sorumutuk ne’e parte rua diskute no esplora potensialidade kooperasaun ne’ebé nasaun rua bele dezenvolve hamutuk iha futuru.
“Espera katak iha future, ita bele iha kooperasaun entre área sira ne’ebé iha tuir Timor-Leste nia nesesidade,” hatete embaixadór Yahel Vilan.
Nia hatutan, iha enkontru ne’e mós diskusaun fó atensaun liu ba área agrikultura, inklui oportunidade atu dezenvolve programa kooperasaun iha setor ne’e.
“Ami mós diskute kona-bá posibilidade harii programa interkámbiu entre estudante sira, no oportunidade atu haruka espesialista sira husi Israel mai Timor-Leste hodi fahe koñesimentu no esperiénsia”, tenik nia.
Diplomata Israel ne’e mós konsidera área edukasaun nu’udar setor importante ida ba kooperasaun, ho esperansa katak iha futuru nasaun rua bele dezenvolve parseria iha área sira ne’ebé tuir nesesidade no prioridade Timor-Leste nian.
Yahel Vilan subliña katak Israel nakloke atu koopera ho Timor-Leste iha área oioin, inklui área defeza, tuir nesesidade no interese Timor-Leste nian.
Dadaun ne’e Timor-oan na’in-100 resin mak hala’o servisu iha Israel. Tanba ne’e iha mandatu diplomátiku ne’ebé hala’o agora, nia objetivu mós atu renova no kontinua programa kooperasaun sira ne’ebé dezenvolve ona antes, liuliu programa ne’ebé envolve Timor-oan sira iha Israel.
Jornalista: Cesarina de Carvalho
Written by: RafaFM
Edukasaun no Defeza Israel Manifesta Interese Kooperasaun ho Timor-Leste iha Setór Agrikultura
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt