Investor Índia Esplora Oportunidade Investimentu iha Timor-Leste

Embaixadór Timor-Leste ba Índia Carlito Nunes aprezenta emprezariusira husi Índia ne'ebé iha interese hakarak investe iha Timor-Leste, Sesta 04 Setembru 2026.

Díli, 04 Setembru 2026 (RAFA) – Delegasaun investidor sira husi Índia hamutuk ho Embaixadór Timor-Leste ba Índia, Carlito Nunes, vizita Timor-Leste atu esplora oportunidade investimentu, liuliu kona-bá ambiente no ekosistema investimentu iha Timor-Leste.

Asuntu ne’e relata bainhira delegasaun investidor sira hamutuk ho Embaixadór Carlito Nunes, hala’o enkontru ho Vise-Primeiru-Ministru no Ministru Koordenadór Asuntus Sosiais, Mariano Assanami Sabino, iha Palásiu Governu, Sesta-ne’e.

Embaixadór Timor-Leste ba Índia, Carlito Nunes informa ba jornalista katak objetivu prinsipál husi vizita delegasaun ne’e atu haree no esplora oportunidade investimentu iha Timor-Leste, inklui ambiente no ekosistema investimentu ne’ebé eziste iha Timor-Leste.

“Ita mai vizita Timor-Leste atu haree no esplora oportunidade investimentu iha Timor-Leste, liuliu ekosistema no ambiente investimentu iha Timor-Leste,” embaixadór ne’e hateten.

Nia hatutan, objetivu seluk mak atu halo ligasaun no hasoru diretamente ho kompañia lokál.

Tuir nia, delegasaun ne’e konsege ona hala’o enkontru ho kompañia nasionál sira no iha planu atu asina akordu kooperasaun ho memorandu entendimentu (MoU).

“Semana oin ne’e, iha ona MoU rua ho Star King Medical Center, ne’ebé sai hanesan ospitál privadu primeiru iha Timor-Leste. Depois, iha mós MoU ida ho konsórsiu kompañia balun ne’ebé lidera husi Sr. Rui Castro, ne’ebé envolve ona iha inísiu vizita delegasaun Índia,” Embaixadór Carlito Nunes subliña.

Nia dehan prosesu esplorasaun oportunidade investimentu sei kontinua, no delegasaun investidor sira sei fila fali mai Timor-Leste iha fulan Dezembru atu kontinua diskusaun no haree oportunidade investimentu sira.

Aleinde ne’e investidor sira husi Índia iha interese atu investe iha Timor-Leste tanba sira iha kapitál atu investe, ho prinsipiu atu halo joint venture ka parseria ho kompañia nasionál.

Setór sira ne’ebé investidor sira iha interese inklui turizmu, agrikultura, mineiru, edukasaun no saúde, no sira mós la taka posibilidade atu espande investimentu ba setór sira seluk.

Iha sorumutu ho delegasaun investidor sira, Primeiru-Ministru no Ministru Koordenadór Asuntus Sosiais, Mariano Assanami Sabino, fó boas-vindas no apresiasaun ba inisiativa investidor sira ne’ebe sira rasik iha interese atu mai investe iha Timor-Leste.

Nia mos haktuir investidor sira mai ho proposta investimentu iha área oioin, ne’ebé governu sei diskuti no sei haree no hili tuir área espesífika ne’ebé bele kontribui ba dezenvolvimentu nasional.

“Investidor sira iha inisiativa rasik atu mai halo investimentu no kontribui ba dezenvolvimentu iha setór oioin. Investidor sira-ne’e mai ho proposta investimentu oioin, no ita bele hili área ida ne’ebé ita hakarak sira investe,” tenik Ministru Mariano Assanami Sabino.

Vise-Primeiru Ministru mos relata kona ba prosesu sira-ne’e sei tama iha faze diskusaun atu define área espesífika ne’ebé sei sai prioridade ba kooperasaun no investimentu.

Antes ne’e delegasaun investidor husi Índia hasoru Prezidente Repúblika, Kámara Komérsiu no Indústria Timor-Leste , no Vise-Primeiru-Ministru I, Francisco Kalbuadi Lay.

Delegasaun ne’e mós vizita ona área Ulmera, ne’ebé governu prepara atu fó oportunidade ba investidor sira atu haree fatin no esplora posibilidade uza ba atividade komersiál, inklui armazén. Sira mós vizita área Tibar atu haree oportunidade investimentu iha área ne’e.

Jornalista: Cesarina de Carvalho