INTERPOL Fó Formasaun Investigasaun Armas Proividas Ba Autoridade Seguransa Timor-Leste

INTERPOL fó formasaun ba investigadór PCIC, PNTL ho F-FDTL inklui ajente nasionál sira kona-bá investigasaun armas proividas, Segunda 28 Setembru 2026.

Díli, 28 Setembru 2026 (RAFA)- International Criminal Police Organization (INTERPOL) liu husi kooperasaun ho Polísia Sientífika Investigasaun Kriminal (PCIC, sigla portugés) fó formasaun kona-bá investigasaun armas proividas ba autoridade seguransa sira iha Timor-Leste.

Diretór Nasionál PCIC, Vicente Fernandes e Brito,  ba jornalista sira iha Palm Spring, Fatuhada, Segunda-ne’e, hatete formasaun ne´e foka liubá Polísia Nasionál Timor-Leste (PNTL), PCIC, FALINTIL-Forsa Defeza Timor-Leste  (F-FDTL) no Ajente Nasionál sira ne’ebé servisu iha fronteira ne’ebé akumula  formandu ema na´in-27.

“Timor-Leste ita kriminaliza armas proividas tuir  ita nia kodigu Penál nia, ne’ebé ha’u hanoin formasaun ida-ne’e ita bele dehan formasaun profesionál, formasaun ne’ebé mak PNTL, PCIC, F-FDTL no mós ita nia ajente nasionál sira-nia servisu loron-loron  nian”, Diretór Nasionál PCIC, Vicente Fernandes e Brito hateten.

Nia hatutan, Timor-Leste sai ona membru ASEAN tenke prepara situasaun sira ne’e bá futuru para nafatin situasaun protidaun, atu nune’e konduz krime investigasaun ne’ebé mak efetivu la’ós armas proividas de’it maibé krime koneksaun sira hotu.

Iha fatin hanesan, Espesialista Ofisial INTERPOL I-Arms, Line Haidar haktuir, objetivu formasaun ne’e la’ós atu haré kilat ne’ebé prende hanesan kazu izoladu, maibé hanesan parte ida hosi eskema krime boot ida. No Formasaun ne’e parte husi Projetu Stonefish, ne’ebé finansia husi Departamentu Enerjia Estadus Unidus nian.

“Ami iha ne’e atu hala’o formasaun hanesan parte ida husi Projetu Stonefish. Projetu ne’e finansia husi Departamentu Enerjia Estadus Unidus nian, ne’ebé ho laran luak tebes fó oportunidade ba ami atu mai Timor-Leste no kolabora ho eskritóriu INTERPOL nian iha Díli,” Line Haidar epslika.

Tuir  Line Haidar hateten, treinamentu ne’e hakarak muda aprosimasaun investigativu konvensional. Kilat-musan ne’ebé prende, hotu-hotu sei la haree hanesan kazu isoladu, maibé hanesan parte ida hosi eskema krime boot ida.

Formasaun ida-ne’e ajuda prevene fluxu kilat nian mai Timor-Leste enkuantu garante nasaun ne’e integra iha rejiaun ida ne’ebé seguru – rejiaun ida ne’ebé dedika ba prevensaun no responde ba tráfiku ilísitu kilat nian, ne’ebé iha ligasaun ho forma oioin krime internasionál no transnasionál nian.

Nia subliña katak treinamentu ne’e krusial tebes tanba kilat sira maka denominadór komún ida iha tipu krime oioin iha mundu. No Objetivu mak atu hakotu fornesimentu kilat sira-ne’e nian fatór xave ida ne’ebé permite atividade kriminoza iha mundu tomak.

Jornalista: Juvinal Cabral/ Marcelino Tomae