Ouvir RAFA Ritmo, Voz e Coração de Timor
Díli, 06 Novembru 2026 (RAFA)-Institutu Nasionál Seguransa Sosiál (INSS) sei aplika koima (multa) ba entidade ka empregadór sira ne’ebé la kumpre obrigasaun kontributóriu Seguransa Sosiál.
Prezidente INSS, Zeferino Bobo da Costa ba jornalista sira iha Díli, Sesta-ne´e, hateten INSS fó oportunidade ba empregadór sira atu regulariza sira nia situasaun to’o fulan-Dezembru tinan 2026. Tanba to’o agora traballadór liu 200.000 rejistu ona iha sistema Seguransa Sosiál, ho entidade empregadór liu 7.000 iha setór públiku no privadu.
Husi total entidade empregadór sira ne’e, 5.612 mak ativu kontribui, enkuantu sira seluk seidauk kumpre obrigasaun, maski INSS fó avizu ona atu regulariza kontribuisaun.
“Se sira la kontribui, tinan 2027, INSS sei aplika multa no mobiliza ekipa inspesaun atu buka tuir entidade empregadór sira ne’e, hodi asegura katak sira kontinua kontribui ba Seguransa Sosiál,” afirma Zeferino Bobo da Costa.
Tuir lei, traballadór ida-idak kontribui 4% husi saláriu, enkuantu entidade empregadór kontribui 6%. Tanba ne’e, INSS aplika multa ba entidade empregadór ne’ebé la kumpre obrigasaun sei bazeia ba taxa ne’ebé lei determina.
Nia esplika sistema Seguransa Sosiál Timor-Leste uza modelu repartisaun, ne’ebé bazeia ba prinsipiu solidariedade. Signifika katak kontribuisaun hotu tama iha fundu komún, la’ós konta individual ba kada traballadór.
Zeferino hatutan, bainhira traballadór to’o idade reforma no kumpre kondisaun legal, INSS sei kalkula nia direitu ba penssaun mensál, ne’ebé selu durante nia moris.
Husi fulan-Janeiru to’o fulan-Setembru ,tinan-ne´e, INSS rejista inspesaun hamutuk 249 iha nivel nasionál, inklui munisípiu sira.
Jornalista: Cristina Ximenes
Written by: RafaFM
INSS Sei Aplika Koima ba Empregadór sira Ne´ebé La Kumpre Obrigasaun Kontributóriu Seguransa Sosiál
todayNovember 20, 2026 11 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt