Noticias

Iha OJE 2027, FDCH Prioritiza Oportunidade Bolsu Estudu ba Timor-oan 903

todayNovember 10, 2026 34

Background
share close

Díli, 10 Novembru 2026 (RAFA) –Fundu Dezenvolvimentu Kapitál Umanu (FDCH) hetan alokasaun Orsamentu iha OJE 2027 ho total montante US$26,400.000 ne’ebé sei prioritiza ba programa bolsa estudu ho númeru benefisiáriu hamutuk 903.

Diretór Ezekutivu FDCH, Júlio Aparicio, informa katak alokasaun orsamentu ne’e sei kontinua tuir prioridade planu IX Governu nian, ho foku ba nesesidade dezenvolvimentu rekursu umanu iha nasaun, liuliu iha setór sira ne’ebé presiza profisionál kualifikadu.

Nia esplika katak área prioridade sira inklui justisa, saúde, edukasaun, enjenaria, turizmu, ospitalidade, agrikultura, teknolojia no área seluk, tuir dadus nesesidade rekursu umanu ne’ebé FDCH iha.

“Ami servisu hamutuk ho universidade sira iha rai-li’ur ne’ebé ita haree nia ranking iha mundu ne’e di’ak no mós área estudu balun  ita iha Timor  laiha duni. Entaun, haruka ita-nia joven sira ne’ebé iha potensial di’ak ba iha ne’ebá para sira aprende buat ruma iha ne’ebá nune’e fila mai hodi kontribui ba dezenvolvimentu iha rai laran,” hateten Diretór Júlio Aparicio iha Parlamentu Nasionál, Tersa ne’e.

Tuir planu FDCH, sei haruka bolseiru na’in-903 ne’e inklui  ona mós Funsionáriu Públiku sira ne’ebé hetan opurtunidade ba bolsu estudu  ne’e kontinua estudu iha nasaun hanesan Indonézia, Malázia, Tailándia, Filipina, Repúblika Korea no Japaun.

Alende ne’e orsamentu bolsa estudu FDCH aloka ba Institutu Nasionál Administrasaun Públika (INAP), enkuantu benefisiáriu sira seluk nia orsamentu sei jere diretamente husi FDCH.

Nia hatutan katak oportunidade bolsa estudu sira ne’e hahú husi nivel Diploma III to’o Doutoramentu.

Durante nia mandatu, hahú husi 2024 to’o 2026, FDCH fó ona bolsa estudu ba ema hamutuk millaun ida, inklui bolsa parsial no bolsa mérito.

Nia subliña katak orsamentu ne’e povu nian, tanba ne’e benefisiáriu sira tenke uza oportunidade ne’e ho responsabilidade no aproveita didi’ak atu hetan koñesimentu no abilidade ne’ebé bele kontribui ba dezenvolvimentu nasaun.

“Husu ba joven sira liuliu jerasaun foun sira, estuda makaas para atu mai aproveita ho didiak. Aproveita atu kontinua dezenvolve rai ida-ne’e ba oin”, nia fo hanoin.

Júlio Aparicio mós informa katak FDCH kontinua fó apoiu bolsa estudu ba sobrevivente sira, inklui ema ho defisiénsia, hodi garante katak sira hetan oportunidade hanesan atu kontinua estudu. Hahú husi 2024 to’o agora, benefisiáriu kategoria ne’e atinje ona ema na’in-70-resin.

Nia mós relata kona-bá orsamentu ba programa  FDCH aloka ba Komisaun Nasionál ba Sobrevivente, ne’ebé sei responsabiliza ba prosesu finansiamentu.

Jornalista: Cesarina de Carvalho

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!