IGJ Klarifika Atividade Jogu Lotaria Grand Dragon Legál

Empreza Lotaria Grand Dragon. Imajen/Rafa.tl

DILI, RAFA,tl- Inspesaun Jerál Jogu (IGJ, sigla portugés) klarifika katak atividade jogu Lotaria Grand Dragon iha lisensa operasionál no legál, maibé buska no apreensaun ne’ebé halo ho mandadu husi Ministériu Públiku ne’e tanba deskonfia empreza loke tan jogu online ne’ebé Governu suspende ona lisensa operasionál sira.

Notísia Relevante: Julgamentu Kazu Grand Dragon Lotaria, Tribunál Aplika Medida Aprezentasaun Periódika Ba Jerente Na’in-tolu

Inspetór Jerál Jogu, Anibal Carvalho Martins ba Rafa.tl via telefónika, Kinta (18/12/2025) hatete, kona-bá atividade Lotaria Grand Dragon iha Praia dos Coqueiros ho Timor Plaza ne’e iha lisensa ne’ebé legál, maibé ho mandadu Tribunál hodi buska no apreensaun ne’e tanba deskonfia kompañia Dragon loke tan jogu online.

“Dragon ne’e empreza ida hetan lisensa ba atividade lotaria nia versaun Singapura ho Kambodia, nia atividade hanesan ho Lotaria Amizade, Rudal maibé nia versaun uza Singapura ho Kambodia, agora ida ne’ebé Polísia halo buska no prende ne’e tanba deskonfia nia halo atividade jogu online iha laran, se nia halo fali atividade  jogu online iha laran ne’e ilegál, mais ida lotaria ne’e la’ós ilegál ne’e legál. Tanba sira selu hela taxa, kumpri hela sira nia dever, selu taxa ba Governu la’o hela, sira fó hela servisu ba ema,” Inspetór Jerál Jogu, Anibal Carvalho Martins hateten.

Inspetór Jerál ne’e hatutan prosesu atu reativa hikas atividade Lotaria Grand Dragon ne’e, hein desizaun husi Tribunál.

Nia esplika, polísia ba halo buska no apreensaun ne’e tanba  rona katak sira uza fali lisensa ida Dragon ne’e halo fali atividade jogu online, ne’e mak polísia tama hodi halo buska no apreensaun ba sira, maibé prosesu sira ne’e ba Tribunál sira sei haré desizaun husi Tribunál mai, se loos duni desizaun Tribunál mak sei deside, se sira la halo buat ida, deskonfia laiha evidénsia, desizaun Tribunál na’in ita sei hein no rona.

“Agora ne’e investigasaun iha ona Tribunál mak sei deside se karik tuir lei maka laiha evidénsia desizaun Tribunál mak dehan kontinua ka  lae, ne’e Tribunál mak deside,” Anibal Carvalho Martins hatutan.

Capital Venture Timor-CVT Deskonfia Halo Atividade Jogu Online

Inspetór Jerál Jogu Anibal Carvalho Martins hatete, kona-bá ekipa  Diresaun Servisu Investigasaun Kriminál (DSIK) ho Polísia Sientífiku Investigasaun Kriminál (PCIC, sigla portugés) ne’ebé ba halo inspesaun ba kompañia Capital Venture Timor-CVT, iha Piso lima (andár 5) prédio Torre ETO, Mandarin, Díli tanba deskonfia halo atividade jogu online.

“Rejolusaun Governu nian sai iha loron 12 fulan-Outubru liubá ko’alia klaru ona katak apartir rezolusaun ne’e fó sai, atividade jogu online sira ne’e ilegál hotu ona, tanba ne’e mak agora ita la’ós ko’alia tan atu hetan lisensa ka la hetan lisensa, agora ne’e illegal,” Anibal Carvalho Martins afirma.

Nia haktuir, atuasaun Polísia halo ne’e kordenasaun ho Inspesaun de Jogu ho PCIC mak ba halo, para ba kaer hotu ema sira ne’ebé halo atividade jogu ilegál ne’e, tantu nia iha lisensa mós taka hotu ona, ne’ebé ba kaer jogu ne’e ilegál hotu ona.

Reportajen ekipa Rafa.tl