Horta-Xanana Agradese no Louva Maturidade Povu Nian iha Selebrasaun Tinan 24 Restaurasaun Independénsia

Enkontru semanál Xefe Estadu ho Xefe Governu iha Palásiu Prezidensiál, Kinta (21/05/2026).

Díli, 21 Maiu 2026 (RAFA.tl)- Prezidente Repúblika (PR), José Ramos-Horta ho Primeiru-Ministru (PM), Kay Rala Xanana Gusmão, agradese no louva maturidade povu tomak Timor-Leste nian, liu-liu ba foin-sa’e sira ne’ebé garante paz no estabilidade durante selebrasaun loron restaurasaun independénsia, ba dala-XXIV (20 Maiu 2002-20  Maiu 2026 ) lao ho di’ak no susesu.

Primeiru-Ministru, Kay Rala Xanana Gusmão, ba jornalista sira hafoin  sorumutuk semanal iha Palásiu Prezidensiál, Kinta (21/05/2026),  konfirma Prezidente Repúblika ho laran haksolok hodi fó nia apresiasaun kle’an ba foin-sa’e sira tanba durante selebrasaun loron Restaurasaun Independénsia, kria nafatin pás no estabilidade to’o remata.

“Prezidente husu ba ha’u atu agradese ba povu tomak, liu-liu ba joven sira tanba durante selebrasaun la akontese buat ida, Prezidente kontente tebes tanba ne’e nia husu labele haluha fó nia obrigadu no apresu boot tebes ba joven sira, ohin loron, hatene garante timor nia naran liu-liu tanba bainaka sira mai barak tebes,  hotu-hotu gosta no apresia tanba ita bei-beik dehan katak tinan 24 ne’e saida mak ita buka hodi estabelese ho metin mak paz no estabilidade,” Primeiru-Ministru Xanana Gusmão hateten.

Xefi Governu ne’e haktuir, selebrasaun ne’e fó oportunidade ba Timoroan hotu atu halo reflesaun kona-bá saida mak halo ona no mós kontaktu ho estrajeiru sira mai no sira mós hatene no akompaña hodi haré katak Timor halo buat barak, maibé seidauk halo buat hotu-hotu.

Foin dau-dauk Primeiru-Ministru hasoru embaixadór husi Kanada nia lori kompaiña boot sira husi Kanada mai ne’ebé hakarak ajuda tanba sai membru ASEAN ninia mós mak foti nia naran ba iha rai bara-barak hodi dehan rai foun ida ihaASEAN nia laran.

“Buat ida reflesaun kona-bá saida mak ita halo ona iha tinan 24 ukun an ne’e, sai hanesan lisaun ida para ita haré, ita presiza vizaun, ita laiha vizaun ba tiha governu halo arbiru, tanba ne’e presiza vizaun, liu-liu fó valor ba erói sira, sakrifisiu no bele ho valor ba ukun an ne’e hodi hadia rai no povu nia moris,” Xanana hateten.

Iha enkontru ne’e, Xefe Governu informa mós ba Xefe Estadu kona-bá Governu nia pedidu urjensia ba Parlamentu Nasionál relasiona ho orsamentu ratifikativu, ne’ebé governu ho estadu agradese ba iha Parlamentu Nasionál tanba hatan pedidu urujensia ne’e.

Xanana Gusmão argumenta katak pedidu urjensia ba Parlamentu Nasionál kona-bá Orsamentu Ratifikativu ne’e atu garante mákina Estadu hodi hatan ba situasaun globál ne’ebé afeta mós ba Timor-Leste.

Jornalista: Elio dos Santos/Editór: Vito Salvadór