Noticias

HNGV Seidauk Simu Karta Reklamasaun Ofisiál Kona-bá Alegasaun Vazamentu Matéria Teste Nian

todayNovember 9, 2026 93

Background
share close

Díli, 9 Novembru 2026 (RAFA) – Prezidente Júri ba Komisaun Rekrutamentu Vaga Kareira Espesializada Hospital Nasionál Guido Valadares (HNGV), Vidal de Jesus Lopes, klarfika katak to’o agora komisaun seidauk simu karta reklamasaun ofisiál kona-bá alegasaun vazamentu matéria no pergunta teste eskrita eletrónika ba kandidatu balu.

Diretór Servisu Apoiu Diagnóstiku no Terapêutika iha HNGV ne’e  esplika kona-bá  prosesu rekrutamentu ne’e iha faze tolu, selesaun dokumentu, teste eskrita eletrónika no entrevista.

“Iha faze inisiál, kandidatu hamutuk 8.084 mak submete dokumentu. Depois hala’o selesaun dokumentu, kandidatu na’in 6.448 la kontinua ba faze tuir mai, nune’e kandidatu na’in 2.072 mak tama ba faze teste eskrita eletrónika. No vaga ne’ebé mak ospitál presiza tuir loloos ne’e 478,” Vidal de Jesus Lopes, informa ba jornalista sira  iha HNGV, Segunda-ne’e.

Nia mós relata kona-bá pergunta teste eskrita eletrónika la hanesan ba área espesialidade ida-idak. Tanba, kada área iha matéria no pergunta rasik, inklui médiku jerál, enfermeiru, parteira, tékniku aliadu, radiolojia, banku raan, farmásia, nutrisaun, tékniku biomedikál, rejistu médiku no oftalmolojia.

Kona-bá alegasaun vazamentu pergunta teste, Vidal afirma katak komisaun seidauk simu reklamasaun ofisiál, maski komisaun akompaña informasaun no imajen sira ne’ebé fahe liuhusi média sosiál no grupu WhatsApp.

“Em-prinsipiu, kualkér kandidatu ida iha direitu tomak atu halo rezumu, atu foti husi livru referénsia oioin ne’e nia direitu. Ami seidauk hetan karta reklamasaun ofisiál ruma dirije mai ekipa júri,” tenik Vidal de Jesus Lopes.

Nia hatutan kandidatu sira iha direitu atu uza livru no dokumentu referénsia ne’ebé relevante ho área espesialidade ne’ebé sira aplika, tanba HNGV mós hanesan ospitál hanorin ne’ebé envolve edukasaun no formasaun klínika.

Nia informa komisaun hala’o enkontru no investigasaun interna atu verifika se iha membru juri ka ekipa rekrutamentu ne’ebé fahe matéria teste eletrónika ba kandidatu ruma.

Alende ne’e, nia dehan sistema eletróniku mak determina rezultadu teste, no la iha ema ne’ebé intervén diretamente iha prosesu pontuasaun.

Nia mós rekoñese katak prosesu rekrutamentu ne’e iha dezafiu, liuliu tanba hosi kandidatu na’in 8.084, agora kandidatu na’in 2.072 mak kontinua ba faze tuir mai. Nia konsidera katak kandidatu balu bele la satisfás ho rezultadu, maibé ida ne’e parte ida hosi prosesu kompetisaun.

Komisaun fó tempu ba kandidatu sira atu hato’o reklamasaun kona-bá rezultadu teste eskrita eletrónika, hahú Segunda to’o Sesta, 9-13 Novembru ne’e.

Kona-bá faze entrevista, Vidal hateten katak ekipa juri sei halo enkontru atu determina mekanizmu, oráriu no númeru kandidatu ne’ebé sei entrevista kada loron, atu asegura kandidatu sira simu konvokasaun tuir data no oras ne’ebé determina.

Iha sorin seluk, Ministra Saúde, Élia  A.A dos Reis Amaral, hatete prosesu rekrutamentu ba profisionál saúde tama ona iha faze teste eskrita, ne’ebé hala’o hamutuk ho HNGV no Komisaun Funsaun Públika (KFP).

Ministra Élia A.A dos Reis Amaral hateten   katak teste ne’e hala’o ho sistema eletróniku, nune’e kandidatu sira tenke prepara an no estuda matéria prinsipál sira ne’ebé relevante ho área ne’ebé sira aplika. Rezultadu ne’ebé publika mós bazeia ba kapasidade no pontuasaun ne’ebé kandidatu ida-idak hetan.

Antes ne’e, portavós Aplikante Vaga HNGV, Atanásio Flores, liuhusi konferénsia  imprensa iha Jardim 5 de Maiu, Colmera, afirma katak aplikante sira-nia parte la satisfás ho rezultadu teste ne’ebé komisaun rekrutamentu publika ona, tanba sira konsidera prosesu rekrutamentu ba vaga kareira espesializada HNGV iha prátika injustisa, familiarizmu, nepotizmu no favoritizmu.

“Ida ne’e mak ami kestiona, la’ós kestiona kona-ba kandidatu sira ne’ebé liu ou lae, maibé kestiona kona-ba prosesu, tanba sira partilla uluk matéria ba ema balun atu asesu uluk, tanba ne’e ami kestiona sira-nia kapasidade,” nia esklarese.

Aplikante sira apela ba KFP, Provedoria dos Direitos Humanos e Justiça (PDHJ) no Parlamentu Nasionál atu akompaña no halo verifikasaun fali ba prosesu rekrutamentu ne’e, hodi asegura katak prosesu hotu-hotu hala’o tuir lei no regulamentu ne’ebé vigora iha Timor-Leste.

Iha biban hanesan, aplikante Vaga HNGV, Cesário Marçal Belo, konfirma katak sira iha evidénsia lubuk ida ne’ebé sai baze atu husu Komisaun Rekrutamentu halo verifikasaun fali no anula rezultadu ne’ebé publika ona, hodi asegura prosesu ne’ebé transparente.

Nia hatutan katak matéria teste ne’ebé komisaun rekrutamentu fahe ba kandidatu balu ne’ebé iha ligasaun besik ho membru komisaun liuhusi WhatsApp, akontese iha loron ida antes kandidatu sira tuir teste eskrita eletrónika.

Jornalista: Cesarina de Carvalho

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!