Noticias

HNGV Distribui Ona Kartaun Dijitál Ba Pasiente 16.300

todayNovember 9, 2026 18

Background
share close

Díli, 09 Novembru 2026 (RAFA) – Ospitál Nasionál Guido Valadares (HNGV, sigla portugés) distribui ona kartaun dijitál hamutuk 16.300 ba pasiente sira ne’ebé asesu servisu konsulta externa nu’udar parte hosi implementasaun sistema dijitalizasaun iha ospitál.

Diretór Servisu Apoiu Diagnóstiku no Terapéutiku HNGV, Vidal de Jesus Lopes, esplika katak kartaun dijitál sira ne’e distribui ona ba pasiente sira atu fasilita asesu ba informasaun no istória médika bainhira sira mai hetan tratamentu.

“Kartaun ne’e vale ba kualker pasiente ne’ebé mai halo tratamentu iha HNGV,” Vidal Lopes hateten ba jornalista sira  iha HNGV, Segunda-ne’e.

Nia esplika kona-ba  distribuisaun kartaun dijitál la halo arbiru, maibé fó ba pasiente sira ne’ebé mai  konsulta iha HNGV. Ba pasiente foun sira, distribuisaun sei kontinua tuir nesesidade, tanba laiha númeru fixu ba pasiente ne’ebé sei simu kartaun, konsidera katak pasiente sira mai hetan atendimentu la iha tempu no loron ne’ebé fixu.

Vidal Lopes hatutan sistema kartaun dijitál ne’e agora uza de’it iha HNGV, tanba ospitál ne’e mak foin implementa sistema dijitalizasaun. Maibé, iha futuru, Ministériu Saúde sei implementa sistema ne’e to’o iha ospitál sira iha munisípiu.

Nia mós informa kona-bá prosesu dijitalizasaun sistema ospitál hahú iha fulan-Jullu no ekipa téknika hala’o ona servisu durante fulan-neen. Agora sistema ne’e tama ona iha faze ikus, ne’ebé inklui formasaun no kapasitasaun ba rekursu umanu sira.

Iha implementasaun sistema dijitalizasaun hala’o liuhusi faze tolu;   dahuluk hadi’a sistema distribuisaun kartaun dijitál, rejistu istória médika pasiente sira no faze daruak mak integra servisu apoiu diagnóstiku no terapéutiku, inklui laboratóriu, radiolojia, farmásia, banku ran, fisioterapia no nutrisaun.

Faze datoluk integra informasaun pasiente sira ne’ebé interna iha ospitál, atu asegura katak dadus no prosesu atendimentu pasiente sira rejista iha sistema.

Tuir nia, agora ekipa tama ona iha faze ikus, mak formasaun ba pesoál saúde hotu, inklui médiku, enfermeiru no parteira sira, atu sira iha kapasidade atu utiliza sistema dijitál ne’e durante hala’o atendimentu.

“Ba oin pasiente sira baixa mediku sira ba halo atendementu la haree ona ba surat tahan, maibe uza hotu ona sistema,” tenik Diretor Vidal Lopes.

HNGV hahú ona atualiza sistema atendimentu dijitál no sei hamenus uza surat-tahan no pasiente sira sei asesu informasaun diretamente liuhusi sistema ne’e, uza komputadór ka laptop ne’ebé sei instala iha  sala atendimentu pasiente interna.

Nia fó ezemplu bainhira pasiente ida halo ezame Raiu-X, médiku sira la presiza ona ba foti rezultadu ne’ebé imprime iha surat-tahan, tanba rezultadu ezame sei tama automatikamente iha sistema dijitál, nune’e médiku bele asesu no lee diretamente husi komputadór.

Jornalista: Cesarina de Carvalho

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!