HNGV Anúnsia Rekrutamentu Ba Profisionál Saúde iha Loron 07 Fulan-Setembru

Diretór Servisu Apoiu Diagnóstiku no Terapêutika HNGV, Vidal de Jesus Lopes.

Díli, 02 Setembru 2026 (RAFA) –Ospitál Nasionál Guido Valadares (HNGV, sigla portugés) sei anúnsia oportunidade rekrutamentu ba profisionál saúde iha loron 07 to’o loron 18 fulan-Setembru ne’e.

Diretór Servisu Apoiu Diagnóstiku no Terapêutika HNGV, Vidal de Jesus Lopes, informa  katak rekrutamentu ne’e hala’o liuhosi koordenasaun entre HNGV, Ministériu Saúde no Komisaun Funsaun Públika (CFP, sigla portugés).

“Rekrutamentu tenke tuir prosesu no kordenasaun entre Ministériu Saúde, HNGV no Komisaun Funsaun Públika. Time line ne’e aprovadu ona husi ekipa júri sira, nune’e agora ita hein deit implementasaun,” Vidal Lopes hateten ba jornalista sira iha HNGV, Kuarta-ne’e.

Nia esplika kona-bá prosesu rekrutamentu sei liuhosi faze tolu, hahú husi selesaun dokumentu, teste eskrita liuhosi sistema CFP, no entrevista husi ekipa júri. Rekizitu  sira ne’e lubuk ida, tanba ne’e bainhira vaga sira taka sai, kandidatu sira bele asesu ba informasaun no tuir prosesu ne’ebé define ona.

Vidal Lopes mós subliña katak HNGV presiza rekursu umanu adisionál, liuliu ba área saúde, atu reforsa kapasidade servisu no hadi’a atendimentu ba komunidade.

Nia garante katak prosesu rekrutamentu sei lao ho transparénsia no la bazeia ba familiarizmu, nune’e Timor-oan hotu ne’ebé prienxe kritériu iha direitu atu konkore.

“Ita boot sira hatene teste liuhusi KFP ne’e rigorozu. Kandidatu ida-idak sei prienxe teste no rezultadu sei sai tuir sistema. Tanba ne’e, informasaun ne’ebé dehan iha ema iha laran ka prosesu la transparente, ita labele asegura. Ema hotu ne’ebé prienxe kritériu iha direitu tomak atu konkore,” Vidal Lopes informa.

Nia  mós haktuir katak HNGV prevee vaga liu 400 ba profisionál saúde iha tinan 2026. Vaga sira-ne’e inklui médiku, parteira, enfermeiru, tékniku aliadu no asistente enfermajen.

Detallu kona-bá kategoria vaga, kritériu kandidatura, dokumentus ne’ebé presiza, prazu entrega no prosedimentu selesaun sei inklui iha anúnsiu ofisiál bainhira vaga sira publika.

HNGV husu ba kandidatu sira ne’ebé interese atu akompaña komunikasaun ofisiál husi HNGV, atu hetan informasaun loos no kompletu kona-ba oportunidade rekrutamentu ne’e.

Antes ne’e iha reuniaun Konsellu Ministru semana kotuk liu ba Ministra Saúde, Elia dos Reis Amaral ba jornalista hateten Ministériu Saúde sei hadia uluk rekezitu balu molok lista rekrutamentu ne’e submete ba CFP.

Govenante ne’e dehan parte Ministériu Saúde no HNGV sei kompleta dokumentasaun ne’ebé presiza, molok nia halo aprovasaun atu submete lista ba CFP.

“Ami sei hadia fali buat balu. Pájina rua ida seidauk kompleta. Ha’u hanoin Diretór HNGV kompleta ona, depois sei haruka mai no ha’u halo aprovasaun, depois sei hahú fó faze ida ne’e,” Ministra Elia hakuir .

Rekrutamentu ne’e relasiona ho implementasaun reforma obrigatóriu ne’ebé KFP anunsia iha 1 Janeiru 2026 tuir rezolusaun governu.

Nune’e Ministériu Saúde identifika ona funsionáriu permanente na’in 100 ne’ebé sei tama iha reforma obrigatóriu.

Ministériu Saúde deside atu loke konkursu públiku ba rekrutamentu pessoal saúde foun, ho objetivu atu substitui funsionáriu sira ne’ebé tama ona iha reforma.

Jornalista Remigia Locatelli/ Cesarina de Carvalho