Halakon Laisorulai F.C 2-1, Ekipa Bairo da Paz F.C Hakat Ba Final Kopa Avó Nana

Jogu entre Bairo da Paz F.C vs Laisorulai F.C iha Kopa Avó Nana hamosu insidente ki'ik entre adeptu sira hodi rezulta feto ida hetan tuku no monu ba rai iha Estádiu Munisipál, Díli, Kuarta 23 Setembru 2026.

Díli, 23 Setembru 2026 (RAFA) – Ekipa Bairo da Paz F.C  hakat ba final Kopa Avó Nana 2026, hafoin manan mehis nia adversáriu Laisorulai F.C ho score  2-1.

Jogu entre klubu rua hala’o iha Estádiu Munisipál Díli, Kuarta ne’e, Laisorulai F.C tun kedas ho ambisaun bo’ot, hodi buka oportundade atu marka golu.

Jogu primeira parte tama iha  minutu 20, defeza husi ekipa Bairo da Paz F.C nian komete erru hasoru liña avansadu ekipa Laisorulai F.C, hodi fó  arbitu deside penalti ba ekipa Bairo da Paz.

Martinho Lopes ne’ebé hetan fiar sai ezekutador ba penalidade refere konsege aproveita ho di’ak hodi produs golu lori nia ekipa Laisorulai F.C, lidera 1-0.

Ekipa rua  nafatin mantein ritmu jogu ho intensidiade aas  hodi buka oportunidade atu produs golu, nune’e tama ba minutu 29, ekipa Bairo  da Paz, aproveita tempu konsege lansa kedas golu ida ba ekipa Laisorulai F.C, hodi muda kuadru escore ba 1-1, to’o termina jogu primeira parte.

Hakat ba segunda parte, tensi jogu komesa manas liután. Ekipa rua ne’e lansa kontra no atake ba malu. Maibé iha minutu 64 atake husi ekipa Bairo da Paz F.C halo bola barullu iha liña defeza  ikus mai konsege produs  golu ida ba ekipa Laisorulai Fc liu-husi Ilário Ximenes, hodi muda score sa’e ba 2-1.

Ho score ne’e, ekipa rua  hasa’e liután sira esperitu vontade jogu, nune’e ekipa Laisorulai  F.C, halo jogu ho kuidadu tebes, hodi buka oportunidade tenta atu lidera golu. Maibe, la konsege tanba defeza husi ekipa Bairo da Paz nian, solidu hodi salva bola ne’ebe sutu husi jogadór sira.

Iha minutu ikus atu termia jogu segunda parte, adversariu ekipa Laisorulai F.C koko halo presaun ba ekipa Bairo da Paz , no tenta  atu produs golu. Maibe, difisil tebes tanba la domina bola, hodi lori ekipa Bairo Da Paz F.C, lidera ho score 2-1 ,to’o jogu segunda parte termina.

Ho rezultadu vitoria 2-1 ne’e, lori ekipa Bairo Da Paz F.C, hakat ba Final Kopa Avá Nana 2026 no sei hala’o jogu kontra  ekipa PNTL F.C, hodi hadau titulu kampiaun iha jogu final.

Observasaun RAFA iha terenu, jogu refere mosu mós dezentendimentu entre jogadór husi ekipa rua nian, ne’ebé  hetan provoka uluk husi adeptu Laisorulai F.C ho asaun tuda bee aqua ba adeptus husi ekipa Bairo da Paz F.C, nian, hodi la simu malu, nune’e mosu kedas dezentendimentu.

To’o notísia ne’e publika seidauk halo konfirmasaun ho parte komisaun organizadora Kopa Avó Nana, ne’ebé sai hanesan realizadór ba jogu kompetisaun ne’e.

Jornalista: David Gonçalves