Governu Timor-Leste Sei Asina MoU ho Malázia Kona-bá Kooperasaun iha Área Telekomunikasaun

PM Xanana Gusmão hasoru malu ho nia ómologu PM Anawar Ibrahim iha vizita ofisiál ba Malázia iha loron 02 fulan-Dezembru tinan 2024. Imajen/dok.G-PM

DILI, RAFA.tl– Konsellu Ministru delibera hodi autoriza Ministru Transporte no Komunikasaun (MTK), Miguel Marques Gonçalves Manetelu, atu asina Memorandu Entendimentu ida (MoU, sigla inglés) entre Governu Repúblika Demokrátika Timor-Leste ho Governu Malázia kona-bá kooperasaun iha ámbitu telekomunikasaun.

Iha komunikadu ofisiál ne’ebé Rafa.tl asesu husi Gabinete Média Primeiru Ministru, Kuarta (22/10/2025), haktuir MoU ne’e ho objetivu atu hametin kooperasaun bilateral iha setór telekomunikasaun, ne’ebé kobre infraestrutura, servisu no asuntu regulatóriu, bazeia ba rexiprosidade no benefísiu mútua.

Entre área prinsipal sira kooperasaun nian mak interkámbiu koñesimentu tékniku no prátika di’ak, kapasitasaun institusional, promosaun peskiza no inovasaun teknolójika, no mós fasilitasaun parseria entre entidade reguladora, operadór no ajente sira setór ne’e nian hosi nasaun rua ne’e.

Akordu ne’e mós prevé programa formasaun, workshop no interkámbiu tékniku, hodi kontribui ba dezenvolvimentu setór telekomunikasoens ne’ebé modernu, seguru no efisiente liu, ne’ebé esensial ba progresu ekonómiku no prosesu integrasaun rejionál Timor-Leste nian iha espasu ASEAN.

Reportajen ekipa Rafa.tl