Governu Timor-Leste Lutu Ba Falesimentu Padre João Felgueiras

Padre João Felgueiras dada-lia ho estudante Eskola Amigos de Jesus ne'ebé sia hanesan nia legadu boot ida mai Timor-Leste. Imajen/dok.Carla Araújo

Díli, 04  Jullu 2026 (RAFA.TL) – Governu Timor-Leste, Sábadu (04/7/2026), hato’o sira-nia tristeza boot ba falesimentu Padre jesuíta João Felgueiras ho idade 105, depois  liu metade sékulu dedika nia misaun ba povu Timor.

“Legadu Padre João Felgueiras sei hela nafatin iha istória Timor-Leste. Nia moris tomak dedika ba servisu, korajen, solidariedade no dedikasaun ba povu sai ezemplu ida kona-bá kompromisu ba edukasaun, justisa, dignidade ema nian no dezenvolvimentu nasaun. Nia sei hela nafatin iha memória no iha povu timoroan nia laran ho sentimentu gratu,” haktuir komunikadu Governu ne’ebé públika ohin.

Komunikadu ne’e mós rekorda moris Padre João Felgueiras no nia kontribuisaun “ba hanorin jerasaun timoroan sira durante tinan barak no ba preserva lian portugés, inklui iha tempu ne’ebé autoridade okupasaun Indonézia bandu ema atu uza lian portugés.”

Komunikadu husi Governu mós lembra katak, depois invazaun Indonézia iha tinan 1975, Padre Felgueiras deside atu hela nafatin iha Timor-Leste, maski hasoru perigu ba nia aan no hetan rekomendasaun atu husik rai ne’e. Nia kontinua akompaña timoroan sira durante períodu ida ne’ebé susar liu iha istória Timor-Leste nian.

Legadu Padre jesuíta ne’e mós hatudu liuhusi kriasaun FACSI – Fundo de Ajuda Caritativa Social da Companhia de Jesus – Comunidade Amigos de Jesus, ne’ebé fó bolsa estudu ba jovem timoroan atus ba atus. Balu husi ne´e depois sai líder no okupa kargu importante iha Estadu no sosiedade sivil. Nia naran mós sei hela nafatin ho Centro Juvenil Padre António Vieira no Escola Amigos de Jesus, iha Díli.

Ministru Prezidénsia Konsellu Ministrus no Porta-vóz Governu, Hermenegildo “Agio” Pereira, ne’ebé temi iha komunikadu ne’e, dehan katak, “iha momentu lutu ida ne’e, Governu hato’o nia kondolénsia kle’an ba kompañia de Jesus, Igreja Katólika, família, belun sira, estudante antigu sira no povu timoroan tomak.”

Nia mós hateten katak Governu partisipa iha tristeza tanba nia partida no fó omenajen ba “memória ema ida ne’ebé halo Timor-Leste sai nia pátria ba nia misaun no ba nia fuan.”

Reportajen Ekipa Rafa.tl