Governu Timor-Leste ho Austrália Diskute Formasaun Rekursu Umanu

Vise Primeiru-Ministru (PM), Ministru Koordenadór Asuntu Sosiais no Ministru Dezenvolvimentu Rurál no Abitasaun Komintáriu, Mariano Assanami Sabino hasoru malu ho Ministra Xefe Territóriu Norte Austrália, Lia Finocchiaro iha Palásiu Governu, Tersa 08 Setembru 2026.

Díli, 8 Setembru 2026 (RAFA) – Vise Primeiru-Ministru (PM), Ministru Koordenadór Asuntu Sosiais no Ministru Dezenvolvimentu Rurál no Abitasaun Komintáriu, Mariano Assanami Sabino Mariano Assanami Sabino, Tersa-ne’e, iha Díli, hala’o enkontru ho Ministra Xefe Territóriu Norte Austrália, Lia Finocchiaro, hodi diskute kona-bá formasaun  rekursu umanu.

“Ami ko’alia kona-ba hasa’e kapasidade formasaun rekursu umanu, no mós oinsá atu hametin no implementa desentralizasaun ne’ebé di’ak. Prioridade ida mak mobiliza ita-nia foin-sa’e sira atu servisu iha Northern Territory,” Vise -PM Mariano Assanami Sabino hateten  iha Palásiu Governu.

Nia relata katak iha ona konkordánsia atu halo diskusaun kle’an liután kona-bá kooperasaun iha setór edukasaun, ensinu superiór no saúde. Ne’e duni, nasaun rua  presiza hametin liután komunikasaun no relasaun tanba Timor oan barak buka moris no servisu iha Austrália.

Vise-PM afirma Governu Timor-Leste sei propoin atu forma ekipa interministeriál hamutuk ho departamentu relevante sira, atu bele servisu hamutuk hodi implementa no realiza kompromisu sira ne’ebé estabelese ona.

Iha fatin hanesan, Ministra Xefe Territóriu Norte Austrália, Lia Finocchiaro reiteira katak nia vizita ne’e atu reafirma kompromisu Northern Territory ba akordu parseria estratéjika ho Timor-Leste.

Nia hatutan objetivu husi enkontru ne’e mak atu asegura iha futuru katak Timor-Leste no Northern Territory bele servisu hamutuk atu hasa’e kapasidade, dezenvolve traballadór ho kualifikasaun, promove mobilidade traballadór no dezenvolve parseria sira seluk ne’ebé bele fó benefísiu ba parte rua.

“Akordu ida-ne’e atu asegura rezultadu prátiku ba povu Timor-Leste no povu Northern Territory. Ba Northern Territory, Timor-Leste mak ami-nia parseiru internasionál besik liu. Ami nu’udar belun ne’ebé iha ona relasaun naruk no forte,” Finocchiaro hateten.

Nia mós destaka komunidade Timoroan ne’ebé hela iha Darwin, Northern Territory, no hatete katak Governu Northern Territory orgullu ho komunidade Timoroan ne’ebá.

Ministra Xefe Territóriu Norte Austrália dehan nia vizita Timor-Leste atu komprende liután oinsá parte rua bele servisu hamutuk, liuliu iha área mobilidade traballadór, dezenvolvimentu kapasidade, formasaun rekursu umanu no hasa’e kualifikasaun.  Parte rua konkorda kona-ba dezenvolvimentu kapasidade, formasaun rekursu umanu no hasa’e kualifikasaun ema sira.

“Ita iha prioridade sira, no ami kompromete atu mobiliza juventude atu kontribui liuhosi servisu sira,”  tenik Lia Finocchiaro.

Finocchiaro hatete katak Timor-Leste no Austrália mós iha interese komún iha tópiku hanesan mudansa klimátika, edukasaun, ensinu superior no saúde, no sei kontinua servisu hamutuk iha área sira-ne’e.

Nia enfatiza katak relasaun entre Timor-Leste no Northern Territory importante tebes, la’ós de’it tanba proximidade jeográfika, maibé mós tanba iha ligasaun família no komunidade entre povu Timor-Leste no Northern Territory.

Jornalista: Cesarina de Carvalho