Governu Sobu Restaurante sira iha Metiaut atu Harii Jardin Husi Ponte B.J. Habibie To’o Kristu Rei

Ekipa pezadu sobu daudaun restorante sira iha Metiaut, Kuarta 5 Agostu 2026.

Díli, 05 Agostu 2026 (RAFA) – Governu liu husi Sekretária Estadu ba Asuntu Toponímia no Organizasaun Urbana (SEATOU) hamutuk ho Ministériu Obras Públikas (MOP) no Diresaun Nasionál Terras no Propriedades (DNTP), sobu restaurante (food court) sira iha área Metiaut hodi prepara área ba projetu harii jardin husi Ponte B.J. Habibie to’o Kristu Rei.

Manajer Nelio Restaurante, Denagier ba RAFA, Kuarta-ne’e, hateten katak antes ne’e MOP halo reuniaun ho proprietáriu restaurante sira no informa katak alargamentu sei hahú iha loron 01 fulan-Jullu tinan 2026 no  Governu mós husu proprietáriu sira  submete dokumentu atu fasilita prosesu indemnizasaun molok demolisaun.

Governu promete sei iha tan reuniaun ida antes ekipa tun ba terrenu, maibé reuniaun ne’e la realiza no ekipa governu derrepente deit hahú sobu restaurante sira.

“Sira hatete katak afetadu hotu sei simu kompensasaun no husu ami submete dokumentu, hanesan konta bankária no dokumentus seluk. Maibé, to’o agora ami seidauk simu orientasaun klaru kona-ba prosesu ne’e, no derrepente deit ekipa mai sobu ami nia fatin negosiu,” Denagier hateten.

Nia hatutan, proprietáriu sira konfirma informasaun iha Ministériu Obras Públikas ho  Diresaun Nasionál Terras no Propriedades (DNTP) no instituisaun relevante seluk, maibé seidauk hetan resposta klaru kona-bá mekanizmu indemnizasaun.

Proprietária Restaurante Paradise, Maria Rosa Fernandes, dehan sira prontu koopera ho governu tanba suporta dezenvolvimentu nasional. Maibé, nia lamenta tanba planu ne’ebé agora implementa la hanesan ho deseñu no informasaun ne’ebé governu apresenta iha reuniaun uluk.

“Iha reuniaun sira hatudu ami modelu ida, maibé agora planu ne’ebé implementa diferente. Ami sente katak informasaun ne’ebé fó ba ami uluk la hanesan ho realidade,” Maria Rosa Fernandes haktuir.

Iha fatin hanesan, Manajer Dapur Timor, Nuno João Correia, dehan nia sente triste tanba restaurante ne’e foin opera durante tinan ida no halo investimentu boot, inklui kria kampu servisu ba juventude Timor-Leste.

“Restaurante ida-ne’e foin tinan ida deit. Ami investe osan barak no fó servisu ba ema Timoroan. Maski hanesan ne’e, ami nafatin koopera ho governu no tuir desizaun ne’ebé iha,” Nuno João Correia hateten.

Restauramnte (food court) Metiaut durante ne’e kontribui ba ekonomia nasionál liu husi selu imposto arrendamentu ba Estadu no absorve kampu servisu ba Timoroan lubun.

Iha observasaun RAFA iha área Metiaut nian nota, proprietáriu restaurante sira hahú desmantela sira-nia fatin negósiu no muda ba fatin seluk ne’ebé sira prepara rasik. Área ne’ebé afetadu hahú husi Finns Resto & Club Metiaut to’o Nelio Restaurante.

Maski maioria proprietáriu sira obedese ba desizaun governu, balu hatudu la satisfasaun tanba sira konsidera informasaun no promesa ne’ebé governu fó uluk la tuir realidade iha implementasaun.

Tuir planu governu, projetu harii jardin husi Ponte B.J Habibie to’o Kristo Rei sei sai parte husi programa embelezamentu no dezenvolvimentu infraestrutura iha Díli, hodi prepara Timor-Leste simu Prezidénsia ASEAN iha tinan 2029.

Jornalista: Remigia Locatelli