Ouvir RAFA Ritmo, Voz e Coração de Timor
Prezidente EDTL,E.P, Paulo da Silva, asina akordu kooperasaun ho International Finance Corporation (IFC) atu kontinua dezenvolve estudu no preparasaun ba projetu enerjia eólika.
Díli, 06 Outubru 2026, (RAFA)- Governu Timor-Leste liuhosi Eletrisidade Timor-Leste, Empreza Públika (EDTL E.P), Tersa-ne’e, asina akordu kooperasaun ho International Finance Corporation (IFC) atu kontinua dezenvolve estudu no preparasaun ba projetu enerjia eólika ne’ebé sei dezenvolve iha Lariguto, Viqueque no Oe-Leu iha Munisípiu Bobonaro.
Prezidente Komisaun Ezekutiva EDTL, E.P. Paulo da Silva hatete projetu enerjia eólika iha Lariguto no Oe-Leu identifika ona nu’udar área sira ne’ebé iha potensiál ba dezenvolvimentu parke enerjia anin.
“Ligadu ho estudu viabilidade no preparasaun ba projetu enerjia eólika iha Lariguto no Oe-Leu ne’e pasu importante ida depois ita bele hetan asisténsia husi maluk IFC atu finaliza prosesu preparativu atu ita bele orienta ba prosesu aprovizionamentu no prepara akordu iha tinan oin mai. Pasu ida ne’e importante atu determina pasu sira tuir mai,” Paulo da Silva hateten.
Reprezentante ADB iha Timor-Leste, David Freedman esplika ekipa téknika husi IFC sei servisu hamutuk ho EDTL atu halo estudu kle’an kona-ba posibilidade dezenvolvimentu projetu enerjia eólika iha lokal rua ida iha Lariguto, Munisípiu Viqueque no ida iha Oe-Leu Munisípiu Bobonaro.
“Akordu ida-ne’e estabelese enkuadramentu ba asisténsia téknika ne’ebé sei fornese husi IFC ba EDTL ho objetivu atu prepara projetu enerjia eólika ne’ebé bele dezenvolve liuhosi investimentu husi setor privadu,” hatete David Freedman.
Nia hatutan, asisténsia ne’e mós sei ajuda EDTL no Governu atu atinji meta no objetivu sira ne’ebé estabelese iha Planu Médiu Prazu 2027–2030.
Iha fatin hanesan, Ministru Obras Públika, Samuel Marçal agradese ba IFC no EDTL, E.P. tanba inisiativa no apoiu ba dezenvolvimentu enerjia liuliu iha setór eletrisidade.
“Ho akordu ida-ne’e bele hahú ona buat balun iha tempu badak atu ajuda Governu iha área enerjia eletrisidade. Se ita bele uza enerjia husi anin no husi loromatan, ita bele redus ona orsamentu Governu ba enerjia eletrisidade,” Ministru Samuel Marçal hateten.
Projetu enerjia eólika rua ne’e, tuir planu atu hahú tama iha prosesu dezenvolvimentu iha tinan 2027 ho prosesu tenderizasaun ba públiku hafoin prosesu preparativu no aprovizionamentu remata.
Governu espera katak liu husi projetu enerjia renovável sira-ne’e bele aumenta produsaun eletrisidade husi fonte alternativu hamenus dependénsia ba kombustível fóssil no apoia dezenvolvimentu sistema enerjia sustentável iha Timor-Leste.
Jornalista: João Carlos
Written by: RafaFM
Governu Sei Dezenvolve Projetu Enerjia Eólika iha Lariguto no Oe-Leu
todayNovember 20, 2026 14 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt