Governu Rekoñese Kontribuisaun Saudozu Ministru José Honório Ba Dezenvolvimentu Ensinu Superiór iha TL

Ministru Ensinu Superiór, Siénsia no Kultura (MESSC, siglá portugés), José Honório da Costa Pereira Jerónimo. Imajen/Rafa.tl

Díli, 22 Abril 2026 (RAFA.tl)- Konsellu Ministru aprova ona Rezolusaun Governu nian ne’ebé hato’o sira-nia tristeza boot ba Ministru Ensinu Superiór, Siénsia no Kultura, José Honório da Costa Pereira Jerónimo nia mate.

Notísia Relevante: Ministru Ensinu Superiór, Siénsia no Kultura José Honório Hakotu Iis

Governu hato’o sentida kondolénsia sinsera ba família enlutada no rekoñese públikamente kontribuisaun boot ne’ebé saudozu halo iha servisu ba Estadu no iha dezenvolvimentu ensinu superiór iha Timor-Leste. Rezolusaun ne’e mós determina atu halo minutu silénsiu ida iha instituisaun públika sira no ensinu superiór hotu-hotu, iha data ne’ebé sei determina.

Iha komunikadu ofisiál ne’ebé Rafa.tl asesa Kuarta (22/04/2026) haktuir, saudozu Ministru José Honório nu’udár sidadaun Timoroan ho méritu rekoñesidu, destaka ninia dedikasaun públika tanba ninia kompromisu ba dezenvolvimentu sistema ensinu superiór, promosaun koñesimentu no valorizasaun kapitál umanu nasionál, tantu nu’udár membru Governu no molok ne’e iha Universidade Nasionál Timor Lorosa’e (UNTL).

Bainhira saudozu hala’o knaar Governu nian, iha ninia servisu sempre bazeia ba padraun ne’ebé aas kona-bá dedikasaun, kompeténsia téknika no espíritu servisu públiku, no mós kontribui ona ba konsolidasaun polítika públika iha área Ensinu Superiór, Siénsia no Inovasaun.

Ninia vizaun estratéjika no kompromisu halo nia bele reforsa kualidade Instituisaun Ensinu Superiór sira, promove kooperasaun akadémika internasionál, no mós habelar oportunidade formasaun avansada ba sidadaun Timoroan sira.

Ninia mate nu’udár lakon ida ba Governu, ba komunidade akadémika no sientífika, no mós ba povu Timoroan.

Jornalista: Elio dos Santos/Editór: Vito Salvadór