Governu Preparadu Antisipa Impaktu El-Niño Iha Setór Agrikultura

Ministru Agrikultura, Peska, Pekuária no Floresta, Marcos da Cruz.

Díli, 02 Setembru 2026 (RAFA) —Ministériu Agrikultura, Peska, Pekuária no Floresta (MAPPF), prepara ona medida sira ajuda agrikultór bainhira enfrenta impaktu husi fenómenu naturál El-Niño,iha área seguransa ai-han no produsaun agríkola.

Ministru Agrikultura, Peska=, Pekuária no Floresta, Marcos da Cruz, hateten El-Niño mak fenómenu klimátiku naturál ida ne’ebé liga ho mudansa temperatura bee-tasi iha parte sentrál no orientál Oseanu Pasífiku, ne’ebé bele hamosu impaktu ba padraun udan no kondisaun klimátika iha nasaun sira, inklui Timor-Leste.

“Ministériu prepara ona kondisaun no apoiu oioin ba agrikultór sira, atu bele kontinua dezenvolve produsaun agríkola iha tempu naruk,” Ministru Marcos da Cruz hateten ba jornalista sira, hafoin reuniaun Konsellu Ministru iha Palásiu Governu, Kuarta-ne’e.

Governante ne’e subliña katak preparasaun Governu, liu-liu iha área seguransa ai-han, importante atu antisipasaun ba impaktu fenómenu El-Niño. Tanba ne’e, Governu hahú ona fó apoiu ba agrikultór sira atu kontinua halo produsaun lokal.

Nia hatutan, iha tinan sira liubá, nasaun barak iha mundu enfrenta períodu bailoron naruk. Tanba ne’e, Governu liuhosi MAPPF kontinua enkoraja agrikultór sira atu aumenta produsaun ai-han lokal, inklui hare, batar no produtu alimentár lokal seluk.

“Agora dadaun iha fatin barak ne’ebé halo ona kolleta hare. Ita nafatin enkoraja agrikultór sira, liu-liu iha fatin sira ne’ebé sei iha bee, atu bele kontinua kuda hare, batar no ai-han sira seluk,” Marcos da Cruz relata.

Ministru Marcos da Cruz esplika servisu Governu la’o hamutuk ho Ministériu Administrasaun Estatal, lider komunitáriu no agrikultór sira, atu bele kontinua asesu ba to’os, natar no área hakiak animál, liu-liu iha fatin sira ne’ebé sei iha rekursu bee.

Aleinde apoiu ba produsaun, Governu mos prepara medida sira kona-ba disponibilizasaun ai-han no apoiu ba agrikultór sira, atu bele kontinua halo kultivu ba ai-han ne’ebé responde ba nesesidade populasaun iha situasaun urjente.

Governu mos fó atensaun ba modernizasaun setor agríkola, liu husi distribuisaun mákina agríkola no konstrusaun infraestrutura irigasaun, ho objetivu atu aumenta volume produsaun no ajuda agrikultór sira enfrenta risku husi mudansa klimátika.

Marcos da Cruz informa katak Governu mós halo esforsu atu aselera konstrusaun no manutensaun infraestrutura irigasaun no barragem sira iha munisípiu balu, inklui Manatuto, Bobonaro no Baucau.

Tuir nia, infraestrutura sira ne’e importante atu garante disponibilidade bee ba agrikultura no permite agrikultór sira kontinua prodús ai-han, maski enfrenta kondisaun bailoron ka falta udan.

“Apóiu ne’ebé ita halo dadaun ne’e inklui mákina sira ba fila rai, trator sira, mákina ba kuda hare no mákina ba koa hare. Barak ona mak ita distribui ba agrikultór sira,” tenik  Ministru Marcos da Cruz.

MAPPF  mós kontinua halo esforsu ba jestaun rekursu bee, inklui konstrusaun no konservasaun iha mota laran, atu bele aumenta kapasidade rai no bee nian no minimiza impaktu husi bailoron naruk.

Marcos da Cruz afirma katak Timor-Leste iha ona planu no preparasaun atu responde ba impaktu fenómenu El-Niño, ho fó prioridade ba seguransa ai-han no kontinuidade produsaun agríkola iha país.

Jornalista : Remigia Locatelli