Governu Nomeia Duílio Gusmão Araújo Ba Diretór Ezekutivu TradeInvest Timor-Leste

Duílio Marino Gusmão Araújo da Silva. Imajen/TradeInvest

Díli, 08 Abríl 2026 (RAFA.tl)- Governu liu husi Reuniaun Konsellu Ministru,  Kuarta (08/04/2026), nomeia Duílio Marino Gusmão Araújo da Silva nu’udar Diretór Ezekutivu ba Ajénsia Promosaun Investimentu no Esportasaun Timor-Leste, I.P, ne’ebé koñesidu ho naran TradeInvest Timor-Leste.

Iha komunikadu ne’ebé Rafa.tl asesa  informa nomeasaun ne’e bazeia ba proposta husi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, no Konsellu Ministrus aprova projetu Rezolusaun Governu ba nomeasaun Duílio Marino Gusmão Araújo da Silva nu’udar Diretór Ezekutivu ba TradeInvest Timor-Leste hodi troka Arcanjo da Silva.

Nomeasaun ne’e bazeia ba kompeténsia téknika no aptidaun ne’ebé hatudu ona ba kargu ne’e, ba mandatu tinan tolu, iha rejime eskluzividade.

Duílio Marino Gusmão Araújo da Silva hala’o knaar nu’udar Diretór Adjuntu iha TradeInvest Timor-Leste dezde tinan 2019, agora sa’e ba diresaun másimu hosi ajénsia ida ne’ebé konsidera sentrál iha polítika ekonómiku timoroan nian, liuliu kona-bá atrasaun hosi investimentu diretu estranjeiru no doméstiku no internasionalizasaun hosi produtu sira nasaun nian.

Duílio Gusmão Araújo nia kareira marka ho espesializasaun progresiva iha promosaun esportasaun, fasilitasaun investimentu, no integrasaun ekonómika rejionál.

Iha nia knaar, nia lidera negosiasaun sira iha nivel aas ho investidór sira iha setór turizmu, agrikultura, peska, no indústria prosesamentu sira – área prioridade sira hosi estratéjia diversifikasaun ekonómika hosi IX Governu Konstitusionál.

Iha Fevereiru 2026, hanesan Adjuntu Diretór TradeInvest, nia destaka relevánsia estratéjiku hosi plataforma dijitál sira ba promosaun no komersializasaun hosi produtu lokál timoroan sira nian, hodi argumenta katak “iha era globalizasaun nian, plataforma dijitál sira sai hanesan instrumentu estratéjiku sira hodi promove no komersializa ita-nia produtu lokál sira.”

Iha Abríl 2025, nia lidera enkontru tékniku interministeriál ida kona-bá negosiasaun Akordu Investimentu Espesiál ida iha setór peska nian, ne’ebé envolve Diresaun Jerál Peska nian, SERVE, Autoridade Tributária, Alfándega, ANLA, no Diresaun Terras no Propriedade sira.

Iha nível rejionál, Diretór Ezekutivu foun iha papél ativu iha fórum sira ASEAN nian, notavelmente Akordu Investimentu Komprensivu ASEAN nian (ACIA), instrumentu ida ne’ebé enkuadra prosesu armonizasaun ambiente negósiu Timor-Leste nian ho padraun rejionál sira.

Nomeasaun ne’e mosu iha tempu ida ne’ebé relevante tebes ba ajénsia no ba nasaun.

Ho adezaun Timor-Leste nian ba ASEAN, TradeInvest ho SERVE – loja úniku ba rejistu negósiu nian – hahú koordena emisaun sertifikadu investimentu nian ne’ebé asegura izensaun fiskál sira, izensaun alfándega nian, no hamenus taxa importasaun nian.

Jornalista: Elio dos Santos/Editór: Vito Salvadór