Governu no Igreja husu Sidadaun hotu Koopera Transladasaun Restus Mortais Preladus Katóliku Na’in-haat husi Tasi-Tolu Ba Igreja Katedral

Komisaun konjunta Governu ho Igreja Katólika.

Díli, 08 Setembru 2026 (RAFA)- Komisaun konjunta Governu ho Igreja Katólika inklui autoridade seguransa, fó sai ona detallu prosesu transladasaun no serimónia funebre ikus restus mortais preladus na’in-haat husi Tasi-Tolu ba Igreja Katedral Imaculada de Conceicao, ne’ebé sei hala’o iha Kinta, 10 fulan-Setembru 2026.

Prezidente Komisaun Organizadora bá serimónia haloot preladus na’in-haat, Pe. Guilhermino da Silva ba jornalista iha Tasi-Tolu, Tersa-ne’e informa, durante serimónia tranladasaun ba Restus Mortais Preladus Katóliku na’in-haat nia estrada sei taka provizoriu hahú iha 17:00 Otl too remata

“Komisaun Organizadora konjunta Governu ho Igreja hakarak hato’o informasaun ofisiál bá públiku liuhusi meius komunikasaun sosial sira kona-ba ordenamentu tránzitu rota komboiu no regras ba serimónia ikus transladasaun no sepultamentu restus mortais ne’ebé sei hala’o iha Kinta 10 Setembru ne’e, atu garantia orden públika no dignidade bá serimónia ida-ne’e, informasaun no orientasaun ne’ebé fó sai ba populasaun tomak mak hanesan tuir mai;

Santa misa no auto ofisiáis sira sei hahú iha oras  tuku 17:00 Otl lokraik. Selebrasaun santa misa iha esplanada Tasi-Tolu sei prezide husi sua Eminensia Dom Virgílio Cardeal da Silva SDB, Arsebispo Metropolitan Díli no Prezidente Konferensia Episkopal Timorense (CET-sigla Portugés) hamutuk ho Amu Bispu Dioseze Maliana no Baucau inklui relijiouzu, relijiouza no sarani sira tomak.

Saserdote ne´e haktuir hafoin misa sei kontinua diskursu ofisiáis husi Prezidente CET, lee leitura despaixu agradesimentu Dom Norberto do Amaral, tuir kedas Monseñor Marcel Smejkal no Prezidente Repúblika.

Entretantu misa hotu sei lori urnas preladus ba iha Igreja Katedral Díli fatin deskansa ikus nian, komboiu transladasaun restus mortais preladus sira hahú husi esplanada Tasi-Tolu hakat bá rotunda Nicolau Lobato Comoro, Fatuhada, Kampung Alor, Ai-tarak laran liuhusi rua Kolmera bá to’o iha Igreja Imaculada de Conceicao Katedral Díli.

Iha Katedral parokia sira simu urnas preladus sira ho tradisaun kultura Timor-Leste iha portaun Igreja Katedral nian, sei lori to’o iha area determinadu protokolar nian,  hafoin entrega ba iha seksaun ala de ponta urnas lidera husi kapitaun lima bá to’o iha Igreja laran, hahú kedas ho serimónia funebre ba restus mortais to’o remata, iha kontinesia onras militár tiru salvu iha Igreja Katedral.

Sira ne’ebé tama iha liña komboiu nian mak Bispu sira no orgaun soberania nasaun nian de’it, ba maluk sira ne’ebé partisipa misa iha Tasi-Tolu sei labá tan Katedral Villa Verde bele asiste de’it transmisaun direta husi orgaun komunikasaun sosiál sira fó iha Tasi-Tolu.

Rute komboiu ne’ebé fó sai hodi transladasaun restus mortais preladus sira estrada sei taka provizoriu hahú horas  tuku 17:00 Otl lokraik to’o serimónia funebre remata atu nune’e movilidade alta entidade sira labele hetan engarafamentu bá to’o iha Katedral ho oras ne’ebé determinadu.

Aleinde ne’e, kestaun fatin iha Katedral ne’ebé limitadu liu-liu iha igreja laran komisaun indika de’it jornalista husi RTTL no GMNTV atu bele fó sai ka halo transmisaun bá públiku Timor-Leste no husu ba média sira seluk bele foti link ka out put husi média rua ne’e.

“Husi komisaun konjunta Governu ho Igreja nian husu ba públiku atu iha kooperasaun no apoiu tomak husi Timor-oan no sarani sira hela iha Díli laran atu nune’e prosesu transladasaun ba funebre restus mortais preladus bele la’o ho di’ak dignu no dame” dehan Padre Guilhermino da Silva.

Iha fatin hanesan Komandante Polísia Nasionál Timor-Leste (PNTL) Komandu munisípiu Díli Komisariu Asistente Polísia Orlando Gomes hateten, tuir planu ne’ebé mak programa mai husi Igreja ninian iha loron Kinta (10/09/2026) ne’e autoridade seguransa halo taktiku hodi halo seguransa masimu ba transladasaun restus mortais preladus sira husi Tasi-Tolu bá Igreja Katedral.

“Ita sei hala’o seguransa taktiku ne’ebé mak iha primeiru halo seguransa iha Tasi-Tolu, segundu ita sei koloka membru sira risku iha rota dalan sira ne’ebé mak ita presiza koloka wainhira sei liu ba to’o iha Katedral”, hatete Komisariu Asistente Polísia Orlando Gomes.

Iha Igreja Katedral nian Komandu sei koloka seguransa masimu hodi asegura serimónia funebre restus mortais preladus na’in-haat la’o ho di’ak.

“Komandu mós sei taka dalan husi rota ninia ita sei taka hahú 15:00 Otl, husi parte karuk ita sei taka husi estrada parte loos mak sei halo movimentu bá mai, ita taka provizoriu para atu nune’e ita la bele mosu engarafamentu wainhira transladasaun bá mai la’o ho di’ak no susesu”, nia informa.

Observasun RAFA iha Tasi-Tolu, restus mortais preladus na’in-haat ne’ebé tau hela iha fatin uma orasaun nian, sarani sira nafatin hala’o vizita loron no tempu kalan  hananu, halo orasaun  no presta omenajen.

Iha Tasi-Tolu autoridade seguransa husi PNTL no FALINTIL-Forsa Defeza Timor-Leste (F-FDTL) inklui seguransa husi igreja hala’o nafatin seguransa masimu iha parte entrada altar no fatin tau restus mortais preladus sira.

 Jornalista: Juvinal Cabral