Governu Kontrata PT Taka Hydrocore Halo Peskiza Ba Rota Kadoras Bayu-Undang no Greater Sunrise Mai Timor-Leste

MPRM Francisco da Costa Monteiro ho Diretór PT Taka Hydrocore, Syukri Fitrialdi, asina akordu peskiza ka estudu jeotékniku ba rota kadoras Bayu Undang no Gretater Sunrise mai Timor-Leste, Kinta 24 Setembru 2026.

Díli, 24 Setembru 2026 (RAFA) — Ministériu Petroleu no Rekursu Natuais (MPRM) selebra akordu ho empreza Taka Hydrocore husi Indonézia ne’ebé atu halo peskiza  ka estudu jeotékniku ba rota kadoras Bayu Undang no Gretater Sunrise mai rai-maran Timor-Leste.

Diretór PT Taka Hydrocore, Syukri Fitrialdi hateten kompañia ne’e sei hala’o levantamentu jeotékniku ba rota ne’ebé pipeline liga Bayu-Undang no Greater Sunrise, inklui área tasi ne’ebé nia kle’an bele to’o metru 3000.

“Projetu ne’ebé ami hala’o mak levantamentu jeotékniku ba rota sira ne’ebé kadoras Bayu-Undang no Greater Sunrise, ne’ebé envolve tasi nia kle’an to’o metru 3.000. Projetu ida-ne’e krusial ba dezenvolvimentu nasionál Timor-Leste no reprezenta marku signifikativu ida,” Syukri Fitrialdi subliña.

Nia klarifika katak PT Taka Hydrocore iha esperiénsia hala’o servisu jeotékniku tasi-ibun iha Indonézia no mós iha Áfrika Osidentál, inklui Kongo, Gana, Angola no Nigéria.

Kompañia ne’e mós hala’o ona servisu jeotékniku tasi-laran iha Myanmar, inklui iha ambiente bee-kle’an.

Syukri Fitrialdi  kompromete atu kompleta projetu ho profisionál, seguru no ho konsiderasaun ba protesaun ambiente.

Nia mós husu apoiu husi parte interesada sira hotu atu garante ezekusaun projetu ne’e ho susesu. Tanba ne’e nia konsidera akordu ne’e nu’udar parte ida husi esforsu Governu Timor-Leste atu avansa dezenvolvimentu infraestrutura ligadu ho projetu Bayu-Undang no Greater Sunrise, inklui opsaun ba utilizasaun infraestrutura pipeline no dezenvolvimentu setor gás no LNG iha Timor-Leste.

Iha fatin hanesan Ministru Petróleu no Rekursu Minerais, Francisco da Costa Monteiro informa katak akordu ne’e sai nu’udar kontinuidade husi prosesu investigasaun jeotéknika ne’ebé Governu Timor-Leste hala’o ona ho kompañia Fugro.

Nia informa iha semana ida-ne’e Governu asina kontratu tolu atu kontinua estudu no investigasaun detallu kona-ba área tasi-laran, liuliu atu hatene kondisaun fundu tasi no rota ne’ebé sei uza ba infraestrutura pipeline husi Greater Sunrise no Bayu-Undan mai Timor-Leste.

“Kontratu ida-ne’e permite kompañia atu halo servisu durante fulan neen. Depois de hetan rezultadu investigasaun sira, dadus ne’e sei uza atu korije no kompleta dezeñu sira ne’ebé presiza, antes tama ba faze final engineering design, hodi ikus mai bele avansa ba konstrusaun no implementasaun projetu sira,” Francisco Monteiro afirma.

Ministru ne’e hatutan katak estudu jeotéknika importante atu identifika kondisaun no posibilidade difikuldade iha rota pipeline, inklui kondisaun rai no fundu tasi.  Tanba, dadus ne’ebé hetan sei análize no kompara ho mapa atu prevene problema iha futuru bainhira infraestrutura pipeline instala ona.

Tuir informasaun ne’ebé fornese, kontratu entre Governu Timor-Leste, liu husi Ministeriu Petróleu no Rekursu Minerais  no PT Taka Hydrocore-Indonézia ho valór  millaun 10 USD.

Jornalista : Remigia Locatelli