Governu Kontinua Hametin Operasaun Hasoru Atividade Ilísitu no Fraude Online

PM Xanana Gusmão

Díli, 16 Jullu 2026 (RAFA.TL)- Primeiru-Ministru (PM), Kay Rala Xanana Gusmão, Kinta-ne’e, iha Palásiu Prezidensiál,  afirma katak Governu kontinua hametin operasaun intelijénsia no foti medida rigór iha esforsu sira ba kombate  atividade ilísitu no fraude online sira iha rai-laran.

“Ami sei hametin kapasidade sira intelijénsia nian, tanba desizaun polítika kona-bá jogu online no fraude sira ne’e halo tiha ona. Ami taka tiha ona operasaun sira iha fatin oin-oin,” Primeiru-Ministru Kay Rala Xanana Gusmão hateten hodi responde jornalista sira hafoin hasoru malu ho Prezidente Repúblika, José Ramos-Horta.

Xefe Governu subliã agora situasaun ezije atu Governu hametin seguransa no kontinua halo detensaun sira.

Iha inísiu semana ne’e, Governu deklara ona polítika ida “zero-toleránsia” hasoru atividade sira hanesan ne’e, hodi nota katak operasaun sira ne’ebé hala’o iha nasaun dezde tinan 2025 rezulta ona iha pelumenus detensaun hamutuk  suspeitu na’in-342.

Númeru atualizadu sira aprezenta hosi Sekretáriu Estadu Komunikasaun Sosiál (SEKOMS) Expedito Dias Ximenes, ne’ebé destaka kompromisu ne’ebé hatudu hosi Polísia Nasionál Timor-Leste (PNTL) no Polísia Sientífiku Investigasaun Kriminál (PCIC) durante operasaun sira ne’e, ne’ebé barak liu akontese iha semana hirak liubá.

“Lori IX Governu Konstitusionál nia naran, ha’u hakarak elojia PNTL ba nia dedikasaun no profisionalizmu hodi hala’o operasaun sira hodi kombate atividade sira hanesan fraude, espesifikamente fraude telefónika no estafa online ne’ebé fó risku ba seguransa públika, ekonomia nasionál, no reputasaun internasionál Timor-Leste nian,” hatete Expedito Ximenes.

Governu enkoraja polísia atu kontinua servisu hamutuk ho Ministériu Públiku, Tribunál, Servisu Migrasaun, Unidade Intelijénsia Finanseira, no parseiru internasionál sira hodi lori responsável sira ba justisa.

Jornalista: Zita Menezes/Editór: Vito Salvadór