Governu ho Setór Privadu Nasionál Hametin Parseria

Enkontru parseria entre governu ho setór privaud nasionál iha Díli, Kinta 13 Agostu 2026.

Díli, 13  Agostu  2026 (RAFA)- Primeiru-Ministru (PM), Kay Rala Xanana Gusmão,  hamutuk ho  Ministru  Obras Publikú (MOP),  Samuel Marcal no Prezidente Kamará Komérsiu Industria Timor-Leste (CCI-TL) Jorge Serrano, halo audiénsia públiku ho setór privadu nasionál hodi hametin parseira dezenvolvimentu infraestrutura no ekonómia iha Timor-Leste.

Iha audiénsia ne’ebé hala’o iha Díli, Kinta-ne’e, Primeiru-Ministru Xanana Gusmão hatete, oportunidade ida-ne’e mak Governu rona no diskuti hamutuk problema saida mak  setór privadu sira aprezenta hodi  nune’e Governu bele fó apoiu no fó  solusaun para  lori dezenvolvimentu ba infraestrutura sira hodi bele hadi’a ekonómia  iha rai laran.

“Ita hasoru malu atu fó hanoin ba malu, hasoru malu atu haré saida mak seidauk la’o di’ak, saida mak la’o, maibé seidauk di’ak tebes, ita hasoru malu saida mak hanesan konflitu entre estadu ho setór privadu, saida mak estadu husi Governu bele ajuda ida mak banku no buat seluk lei  no saida tán hodi ita bele la’o,” Xanana Gusmão hateten.

Ministru Obras Públiku (MOP), Samuel Marcal iha nia diskursu hatete, setór privadu sira tenke halo  inovasaun no dezenvolve ba produtu lokál sira hodi bele halo exportasaun ba rai-li’ur no bainhira setór privadu forte reseita kuandu maka’ás ba estadu liuhosi selu taxa bele la depedénsia ona ba fundu petroliferu.

“Husi setór privadu mak ita-nia infraestrutura forte mak ita-nia sirkulasaun ekonómia bele di’ak. Ita bele ko’alia produsaun ida ne’ebá, ko’alia produsaun ida-ne’e, setór privadu, maibé agora Governu hahú halo investimentu ba setór privadu sira,” Ministru MOP Samuel Marcal hateten.

Governante ne’e afirma husi setór privadu mak bele kria empregu ba joven sira, ne’ebé ba servisu iha nasaun estanjeiru sira, no mós iha rai-laran,  tanba ne’e husu setór privadu sira tenke halo investimentu maka’ás iha área oin-oin hodi bele kria empregu no hadi’a ekonómia rai-laran.

Jornalista : Zita Menezes