Governu ho Igreja Halo Preparasaun Intensivu iha Altar Tasi-Tolu Ba Missa Hamutuk ho Preladu Katóliku sira

Díli, 27 Agostu 2026 (RAFA) – Governu Timor-Leste hamutuk ho Uma Kreda Lokal Timor hahú ona prepara intensivu iha área Altar Tasi-Tolu, Díli, atu simu no realiza serimónia missa hamutuk no belada ba restu mortais Preladu katóliku sira nian molok haloot iha fatin ikus Igreja Parokia Katedral Imaculada Conceição Villa-Verde, Díli.

Preladu katoliku sira ne´e mak, Bispu Jaime Garcia Goulart, Bispu José Joaquim Ribeiro, Monseñor Martinho da Costa Lopes, no Bispu Alberto Ricardo da Silva.

Preparasaun ne’e envolve organizasaun espasu, limpeza, instalasaun eletrisidade, hadi’a jardin, seguransa no koordinasaun entre instituisaun relevante sira, ho objetivu atu garante prosesu simu restu mortais lao ho orden, dignidade no tuir protokolu.

Site Manager husi Kompañia Roman ASN3 Lda, Verisimo Monteiro Marcal, ba RAFA Kinta-ne´e hatete katak servisu iha área jardin ATT atinji ona  porsentu 90 no hein atu entrega ba Governu.

“Ami nia preparasaun iha área kampaun jardin nian atinji ona porsentu 90. Kadeira sira ami halo hela dadauk iha jardin, inklui kuda ai-funan. Iha loron rua nia laran, servisu hirak ne’e sei finaliza no entrega ona. Kadeira ami halo hamutuk 198,” Verisimo Monteiro Marcal hateten.

Nia esplika katak projetu ne’e hetan husi Ministériu Planeamentu no Investimentu Estratéjiku (MPIE), ho atividade hahú iha fulan-Maiu 2025.

Hafoin preparasaun dezeñu no BOQ, kompañia ne’e hetan kontratu iha fulan-Dezembru 2025 no kontinua hala’o servisu to’o agora. Nune’e, tuir planu, finalizasaun ba projetu ne’e sei realiza iha loron 30 fulan-Agostu 2026.

Iha parte seluk, Governu liuhosi instituisaun kompetente sira kontinua halo koordenasaun ho família no parte relevante sira atu determina prosedimentu no oráriu ba simu restu mortais, inklui preparasaun serimónia no akompañamentu ba família sira.

Aspetu seguransa mos sai prioridade, liuliu iha kontrolu movimentu ema no viatura, organizasaun área ba família, autoridade no públiku, no garantia katak serimónia bele hala’o ho orden no dignidade.

Observasaun RAFA iha terenu, haré katak tékniku sira husi EDTL ho kolaborador sira halo hela instalasaun eletrisidade no hadi’a jardin.

Iha fatin hanesan, Autoridade Munisipál Díli hamutuk ho Korpu Bombeirus halo limpeza no fase estrada husi Rotunda Nicolau Lobato to’o área Altar Tasi Tolu.

Governu deside Toleransia pontu iha loron 01 fulan-Setembru

Atu fó omenajen ba Prteladu katóliku sira ne´e, governu deside toleránsia pontu  loron tomak iha loron 01 fulan-Setembru no iha loron 10 fulan-Setembru, governu deside toleransia pontu loron sorin (iha parte loraik), iha okaziaun trasladasaun restus mortais hosi preladu katóliku sira ne’ebé hala’o knaar pastorál iha Timor-Leste

Progrma Serimónial

Iha Fulan-Setembru 2026, Governu Repúblika Demokrátika Timor-Leste no Konferénsia Episkopál Timor-Leste sei simu serimónia ofisiál sira hodi fó onra ba Bispu Jaime Garcia Goulart, Bispu José Joaquim Ribeiro, Monseñor Martinho da Costa Lopes, no Bispu Alberto Ricardo da Silva. Eventu sira-ne’e rekoñese sira-nia dedikasaun pastorál no kontribuisaun folin-laek ne’ebé sira halo ba povu Timór—heransa ida ne’ebé sei inspira nafatin jerasaun prezente no aban-bainrua nian.

Ho tema “Retratu sira Fiar nian no Memória Eterna Igreja nian no Timor-Leste nian – SELEBRA Legadu no Sakrifísiu hosi Ita-nia Saudozu Preladu sira-nian”, serimónia sira marka regresu ba Timor-Leste restu mortais sira hosi Bispu Jaime Garcia Goulart, Bispu José Joaquim Ribeiro, no Monseñor Costa Martinhopes. Hamutuk ho Bispu Alberto Ricardo da Silva nia ruin, eventu sira-ne’e serve nu’udar momentu omenajen no rekoñesimentu ba legadu espirituál, istóriku no nasionál Preladu na’in-haat ne’e nian.

Momentu xave sira hosi programa ofisiál inklui serimónia simu restu mortais sira iha loron 1 fulan-Setembru iha Aeroportu Internasionál Prezidente Nicolau Lobato, tuir fali ho prosisaun ba Tasi Tolu; omenajen ida ba Monseñor Martinho da Costa Lopes iha loron 3 fulan-setembru iha Manatuto, ne’ebé inklui fó naran ba Ponte Manatuto hodi fó onra ba nia; no, iha loron 10 fulan Setembru iha Tasi Tolu no Katedrál Dili, Missa Omenajen no serimónia enserramentu no intermentu ba Preladu na’in haat nia ruin.

Programa ofisiál

Loron 01 Fulan-Setembru, Prladu sira ni9a Restus Mortais too iha Timor-Leste, Aeroportu Internasionál Prezidente Nicolau Lobato-Díli iha orasa 13:30 OTL.

Tuku 13:55 OTL, Komité Organizadora Governu no Guarda Honra Militár hein transporte restu mortais Preladu sira nian ba fatin serimónia nian.

Tuku 14:00 OTL, Asina dokumentu entrega ba Preladu sira nia restu mortais entre Komisaun Organizadora Governu no Konferénsia Episkopal Timor nian.

Tuku 14:05 OTL, Liafuan badak husi reprezentante Komisaun Organizadora Governu no Konferensia Episkopal Timor nian.

Tuku 14:15 OTL, Transporta ba Preladu sira nia ruin husi Aeroportu Internasionál Prezidente Nicolau Lobato ba esplanada Tasi Tolu.

Iha loron, 03 Fulan-setembru 2026, Omenajen ba Monseñor Martinho da Costa Lopes, Manatuto.

Tuku 09:00 OTL, Bainaka sira nia to’o iha fatin serimónia nian.

Tuku 09:30 OTL, Saída husi Monseñor Martinho da Costa Lopes nia ruin husi Laleia, ho diresaun ba Manatuto.

Tuku 10:00 OTL, Para iha Ponte Manatuto durante prosesaun husi Laleia ba Igreja Parokia Manatuto.

Tuku 10:10 OTL Aprezentasaun memento husi povu Manatuto ba Prezidente Konferensia Episkopal Timor nian.

Tuku 10:15 OTL, Leitura Rezolusaun Governu nian.

Tuku 10:20 OTL, Diskursu husi Sua Exelénsia Prezidente Repúblika.

Tulu 10:50 OTL, Inaugurasaun ba plaka komemorativa ne’ebé fó naran ba Ponte Manatuto nu’udar “Msgr. Martinho da Costa Lopes Bridge,” tuir fali ho bensaun ba ponte ne’e husi Amu Bispu Dili.

Tuku 11:00 OTL, Simu bainaka sira iha Salaun “Ulfa Ikero”.

Loron 10 fulan-Setembru tinan 2026, Serimónia enserramentu ba transferénsia restu mortais preladu sira nian iha Tasi Tolu.

Tuku 17:00 OTL, Santa Misa ne’ebé prezide husi Sua Eminénsia Virgílio Kardeál do Carmo da Silva, SDB, Amu Bispu Metropolitanu Dili no Prezidente Konferénsia Episkopál Timor-Leste.

Hafoin Santa Missa:

Leitura despaxu ofisiál husi Sekretáriu-Jerál Konferénsia Episkopál Timor-Leste nian;

Diskursu husi Pró-Prezidente Konferénsia Episkopál Timor-Leste nian;

Diskursu husi Prezidente Repúblika.

Hafoin remata bensaun ikus iha Tasi Tolu:

Serimónia hakoi Restus Mortais preladu sira-nian iha Katedrál Dili;

Vizita ba Monumentu no Jardin Memoriál iha resintu Katedrál nian.

Jornalista: João Carlos