Governu ho FFTL Parabeniza Asosiasaun Futsal Ba Realizasaun Kopa AFTL 2026

MJDAK Nelio Isaac Sarmento ho Preizdente FFTL, Nilton Telmo Gusmão dos Santos hato'o parebeniza ba prezidente ezekutivu Antoninho Junior Guterres Ximenes iha abertuga Kopa AFTL 2026

Díli, 26 Maiu 2026 (RAFA.tl)- Ministru Juventude Desportu Arte no Kultura (MJDAK), Nelio Isaac Sarmento, ho Prezidente Federasaun Futebol Timor-Leste (FFTL), Nilton Telmo Gusmão dos Santos, apresia no parabeniza Asosiasaun Futsal Timor-Leste (AFTL) ba realizasaun Kopa AFTL 2026 hodi prepara fini jogadór di’ak ba selesaun nasionál Timor-Leste.

Notísia Relevante: Abertura Kopa AFTL 2026, Gamer F.C Manan Crazy Horse F.C ho Score 1-0

AFTL liu husi órgaun ezekutivu iha inisiativa no ho kompromisu tomak organiza Kopa AFTL 2026 hodi envolve Klubu Futsal sira iha Primeira no Segunda Divizaun atu bele prepara di’ak liután ba Liga no mós prepara fini jogadór ne’ebé merese ba selesaun nasionál hodi kompete iha jogu sira Rejionál no Internasionál nian.

Ministru Nélio Isasc Sarmento, iha nia diskursu abertura ba Kopa AFTL, iha Kampu Futsal Kuartel Jenerál FALINTIL-Forsa Defeza Timot-Leste (F-FDTL), Segunda (25/05/2026), hato’o parabéns ba AFTL  ne’ebé iha hanoin di’ak hodi anima amante futsal sira no liu-liu kontribui oinsá liu husi Kopa AFTL ne’e bele produs jogador di’ak sira ba selesaun nasionál Timor-Leste.

“Ha’u fó parabéns ba AFTL tamba mesak joven deit, sira iha hanoin di’ak oinsá atu realiza Kopa AFTL ne’ebé ho nia objetivu atu kontinua ba Liga Futsal. Ha’u hakarak enkoraza sira katak, husi atividade futsal ne’e, ha’u bele dehan animu populasaun komesa maka’ás ba feto-mane,” Nélio Isaac hateten.

Governante ne’e hatutan haré ba animu no talentu ne’ebé foin-sa’e sira iha, liu-liu kuaze iha bairru sira hotu, komunidade sira hahú organiza torneiu sira ba futsal, no MJDAK mós halo ka dezenvolve ona kampu futsal barak atu tulun inisativa sira ne’e no iha futuru sei mellora di’ak liután.

Iha fatin hanesan, Prezidente FFTL, Nilton Telmo Gusmão dos Santos hato’o apresiasaun ba AFTL ne’ebé realiza Kopa Futsal 2026 hodi hatudu inisiativa ne’ebé AFTL halo bele kontinua haforsa jogadór sira nia abilidade, inklui buka fini di’ak hodi haforsa selesaun nasionál iha futuru.

“Inisiativa ne’ebé di’ak, tanba ita-nia rai presiza iha atividade desportiva barak liután, tanba ne’e mak Prezidente AFTL ho nia estrutura organiza Kopa AFTL ne’e, no FFTL sauda inisiativa ida ne’e, no haksolok ho sira nia inisiativa tanba ho nune’e mak ita bele fó oportunidade ba ita-nia atleta sira atu bele kontinua ezerse sira nia  funsaun hanesan atleta hodi bele manan esperiensia barak liu iha jogu sira hodi kontribusi ba selesaun nasionál,” Nilton Gusmão hateten.

Prezidente AFTL, Antoninho Junior Guterres  Ximenes afirma objetivu realiza kopa AFTL 2026 atu prienxe orariu ne’ebé mamuk inklui halo preparasaun ba liga futsal ne’ebé sei realiza iha fFulan-Jullu, tinan ne’e.

“Ida ne’e tama iha Ami nia kompromisiu katak, ita labele kontinua nafatin ho liga deit, tanba liga iha tinan ida ita halo iha fulan haat no lima deit, entaun ne’e la efetivu atu prepara selesaun nasionál, tanba tempu ba deskansa barak liu ba jogadór sira, entaun ita organiza kopa ida ne’e  atu prienxe netik fulan ida ka rua, hodi halo nakonu kalendariu, atu ita iha preparasaun di’ak ba mós liga,” Antoninho Junior Guterres  Ximenes esplika.

Prezidente ezekutivu AFTL ne’e subliña Asosiasaun nia objetivu prinsipal ba organiza Kopa AFTL mak mellora no prepara jogador sira ba kompete iha Liga Futsal no bele hetan fini jogadór di’ak liubá selesaun nasionál Timor-Leste.

Iha Kopa AFTL 2026, Klubu husi primeira no Segunda Divizaun Liga Futsal Timor-Leste hamutuk 23 mak sei kompete hanesan,  Ramelau F.C, Maudoko F.C, Saralima F.C, As Jerman, Fiel F.C, Loriku F.C, Mauputar F.C, Caesar Dante F.C,  AD BAS,  Boasorte F.C, B’ Tal F.C, M-VDL F.C, Crazy Hourse F.C, Sao F. Xavier F.C, Gamer F.C, Santa-Cruz F.C, Kablake F.C, Because United F.C, F.C Coelho, Musilha F.C, AD Estrala Baguia, Kuda Ulun F.C no Akademica F.C.

Jornalista: Marito da Costa/Editór: Vito Salvadór