Governu Ho Empreza Thales Formaliza Kontratu Akizasaun Kaderneta Pasaporte 76.920

Governu Ho Empreza Thales Formaliza Kontratu Bá Akizasaun Kaderneta Pasaporte hamutuk 76.920, Kinta 24 SEtembru 2026.

Díli, 24 Setembru 2026 (RAFA)–  Governu Timor-Leste liu husi Ministériu Justisa (MJ) ho empreza Thales, Kinta-ne’e, formaliza  kontratu bá fornesimentu kardeneta pasaporte eletróniku foun hamutuk 76.920.

Ministru Justisa Sérgio de Jesus Fernandes da Costa Hornai iha nia  diskusu hatete, kontratu nu’udar parte husi esforsu Governu atu garante kontinuidade no seguransa servisu pasaporte bá sidadaun hotu iha teritóriu Timor tomak.

“Ho satisfasaun no  responsabilidade institusionál aas mak ita iha enkontru ohin hodi assinala formalizasaun asinatura kontratu ida-ne’e, ne’ebé prevee fornesimentu kardeneta pasaporte eletróniku foun hamutuk 76.920,”  hatete Ministru Sergio Hornai.

Governante ne’e afirma,  asina   kontratu ne’e la’ós de’it atu reprezenta aktu administrativu ka  formalidade ida,  maibé  atu simboliza, liuliu, kompromisu no kontinuidade husi Ministériu Justisa no Governu Timor-Leste nian, bá seguransa nasionál, soberania. No Estadu Timor nian no meius atu garante direitu fundamentál  sidadaun hothotu nian, atu desloka ho dignidade no seguransa iha kontestu internasionál.

Estadu Timor-Leste nia pasaporte mak sai hanesan espresaun ida husi soberania ne’ebé vizivel tebes iha rai li’ur. No Kauza ida-ne’e mak halo Timor-Leste, dezde introdusaun Pasaporte Eletróniku, foti kompromisu ne’ebé moos atu adota padraun internasionál ne’ebé kumpri ezijensia   husi Organizasaun Aviasaun Sivil Internasionál (ICAO).

“Ita hakarak garante katak timor-oan ida-idak, bainhira viaja, lori dokumentu ne’ebé seguru, modernu, labele violadu no recoñesidu luan iha aeroportu hotu-hotu iha mundu,” nia dehan.

Ministru Sergio  lembra  fali katak, Govenrnu Timor-Leste nia parseria ho kompañia ne’ebé kontratadu ohin, komesa dezde 2017.

Nia informa dadus ne’ebé iha ba asina kontratu ba fornesimentu kardeneta pasaporte eletróniku lote primeiru hamutuk 150.000. Durante tinan sira-ne’e, relasaun kooperasaun ida-ne’e fo duni meius hodi responde bá nesesidade identifikasaun no viajen husi ita-nia populasaun, hodi garante kontinuidade servisu públiku ne’ebé essensiál.

Nia afirma, akizisaun kardeneta foun 76.920 ne’e tama iha   Ministériu  Justisa nia estratéjia bá planeamentu no jestaun preventiva, hodi garante katak la iha faillansu  ka la iha rutura stock.

Nia fundamenta, Diresaun-Jerál Servisu Rejistu no Notariadu bele iha meius ho matéria prima ne’ebé presiza hodi atende bá pedidu sira ne’ebé aumenta husi ita-nia sidadaun sira, tantu iha rai laran no mós  rede konsulár iha estranjeiru.

Ministru Sérgio husu reprezentante sira husi kompañia parseiru atu kumpri rigorozamente prazu sira ne’ebé estabelese ona, no asegura manutensaun padraun teknolójia ho nivél seguransa, tuir kontratu ne’ebé konkorda ona.

Iha enkontru ho reprezentante kompañia parseiru, Ministru Sérgio subliña katak kumprimentu prazu no garantia kualidade tenke sai prioridade prinsipál iha prosesu produsaun pasaporte.

Nia fundamenta, rigór iha emisaun no kualidade materiál pasaporte nian la’ós de’it asuntu tékniku, maibé sai parte importante husi seguransa nasionál. Tanba ne’e, padraun sira ne’ebé kontratadu tenke kumpri ho responsabilidade no la bele kompromete.

“Rígór iha emisaun no kualidade husi materiál pasaporte nian mak imperativu seguransa nasionál ida ne’ebé ita nunka bele husik,” tenik Ministru Sérgio.

Ministériu kontinua monitoriza implementasaun kontratu no kooperasaun ho kompañia parseiru, atu asegura katak produsaun pasaporte lao tuir prazu, padraun tékniku no rekizitu seguransa ne’ebé estabelese ona.

“Bá funsionáriu sira husi Ministériu Justisa no Servisu Rejistu no Notariadu nian, ha’u hato’o mós ha’u-nia agradesimentu no matenek bá imi-nia esforsu loron-loron iha prestasaun servisu ida-ne’e ba Timor-oan sira” nia  dehan.

Ministériu Justisa  sei kontinua servisu hodi moderniza  servisu públiku , halo ho  efisiente liu, lalais liu no asesivel bá ema hotu-hotu.

Iha fatin hanesan Diretór Ezekutivu Komersiál  Empreza Thales,  Raymond Law , reafirma nia kompromisu atu kontinua servisu hamutuk ho Ministériu Justisa Timor-Leste iha área dokumentu viajen, liu-liu iha dezenvolvimentu no introdusaun dezeñu pasaporte foun bá sidadaun Timor-Leste.

Tanba  ne’e nia hato’o agradese bá  Governu Timor-Leste liu-liu Ministériu Justisa tanba konfiansa  ne’e kontinua durante tinan 10 liubá.

“Ne’e onra bá Thales atu servisu hamutuk ho Ministériu no apoia emisaun pasaporte seguru bá sidadaun Timor-Leste,” dehan Raymond Law.

Nia afirma , projetu foun ne’e sei lori dezeñu pasaporte foun ne’ebé reflete kompromisu hamutuk ho Governu Timor ,atu hametin seguransa no integridade dokumentu viajen  husi sidadaun Timoroan sira.

Raymond Law mos esplika katak introdusaun dezeñu pasaporte foun la’ós prosesu simples, maibé envolve etapa sira ne’ebé rigorozu no jestaun ho kuidadu, inklui prosesu revizaun no aprovasaun.

Tanba ne’e, tuir Raymond Law,  empreza  Thales prontu atu servisu  hamutuk ho ekipa Ministériu Justisa durante implementasaun projetu ne’e.

Parseria entre empreza Thales ho Ministériu Justisa ne’e marka ona tinan 10, no projetu foun kona-bá pasaporte konsidera hanesan kontinuidade husi kooperasaun entre parte rua atu suporta seguransa no modernizasaun dokumentu ofisiál Timor-Leste hanesan kaderneta Pasaporte nian.

Jornalista: Marcelino Tomae