Noticias

Governu ho Banku Mundiál Sei Selebra Akordu Finansiamentu Millaun 30 USD Ba Projetu Abastesimentu Bee iha Baucau

todayNovember 16, 2026 43

Background
share close

Díli, 16 Novembru 2026 (RAFA)- Konsellu Ministru, liu husi Reuniaun estraordináriu, Segunda-ne´e, delibera no aprova akordu finansiamentu ne’ebé sei selebra entre Repúblika Demokrátika Timor-Leste no Asosiasaun Internasionál ba Dezenvolvimentu (IDA), instituisaun ida ne’ebé pertense ba Grupu Banku Mundiál, ho ekivalente millaun 30 USD, atu finansia Projetu Abastesimentu Bee ba Kapitál Munisípiu Baucau.

“Objetivu prinsipál projetu ne’e nian mak atu hadi’a asesu ba bee-moos ne’ebé seguru ba populasaun Baukau, liuhosi konstrusaun no reabilitasaun ba infraestrutura fornesimentu bee iha kapitál munisípiu no mós iha área priurbana (ne’ebé besik sidade) sira ne’ebé selesiona ona. Hein katak, iha tinan 2031, maizumenus ema rihun 37 sei hetan benefísiu hosi abastesimentu bee ida ne’ebé kontinua no ho kualidade, liuhosi instalasaun ka reabilitasaun hosi ligasaun doméstika sira maizumenus 5700, ne’ebé kobre mós eskola 15,” RAFA sita komunikadu ofisiál

Intervensaun sira ne’ebé planeia ona inklui reabilitasaun no protesaun ba bee-matan sira ne’ebé eziste, konstrusaun ba estrutura foun sira ba kaptasaun, estasaun bombajen no tratamentu nian, rezervatóriu armazenamentu nian, no mós rede distribuisaun sira. Projetu ne’e inklui mós medida sira atu hadi’a efisiénsia no sustentabilidade sistema nian, hamenus bee ne’ebé lakon, no hametin kapasidade atu responde ba tempu bailoron nian no fenómenu klimátiku sira seluk ne’ebé estremu.

Finansiamentu ne’e inklui mós asisténsia téknika no hasa’e kapasidade ba empreza públika Bee Timor-Leste (BTL), ne’ebé responsavel ba operasaun no manutensaun infraestrutura nian hafoin remata obra sira. Ezekusaun projetu ne’e responsabilidade Ministériu Obras Públikas nian, ho supervizaun husi Konsellu Administrasaun Fundu Infraestruturas nian.

Empréstimu ne’e fó ho kondisaun konsesionál, ho períodu reembolsu tinan 40, inklui períodu karénsia tinan 10, no taxa servisu anuál 0,75% ba montante sira ne’ebé utiliza.

Ho investimentu ida-ne’e, Governu hanoin atu hadi’a kondisaun moris no saúde populasaun Baucau nian, garante fornesimentu bee ne’ebé konfiavel no sustentável liu, no mós kontribui ba dezenvolvimentu ekonómiku no sosiál munisípiu nian.

Konsellu Ministrus mos delibera hodi autoriza Ministra Finansas, Santina J. R. F. Cardoso, atu halo negosiasaun ba akordu kréditu ida ho Asosiasaun Internasionál Dezenvolvimentu (IDA), entidade ne’ebé pertense ba Grupu Banku Mundiál, ho montante to’o  millaun 39 USD, hodi finansia Projetu Daruak Estrada Sekundária Timor-Leste nian (Second Timor-Leste Branch Roads Project – TLBRP2).

Projetu ne’e ho objetivu atu hadi’a ligasaun rodoviária sira no fasilita asesu ba populasaun, liuliu produtór agríkola sira, ba merkadu no servisu esensiál sira, liuhosi intervensaun iha seksaun selesionadu sira hosi korredór Gleno-Maubisi. Intervensaun sira ne’ebé planeadu inklui hadi’a maizumenus kilómetru 12 hosi estrada entre Aitutu no kruzamentu Hatubuiliku, kilómetru 5,4 hosi ligasaun entre kruzamentu ida-ne’e ho Santuáriu Ramelau, no mós ponte neen. Planeia ona mós medida seguransa rodoviária, drenajen, no adaptasaun ba risku klimátiku sira, aleinde asaun sira ba reforsu institusionál setór rodoviáriu nian.

Jornalista: Zita Menezes

 

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!