Governu Haruka OJE 2027 Ba Parlamentu Nasionál iha Fulan-Outubru

PM Xanana halo enkontru ho PR Ramos-Horta iha Palásiu Prezidensiál, Sesta 11 Setembru 2026.

Díli, 11 Setembru 2026 (RAFA)- Primeiru-Ministru (PM), Kay Rala Xanana Gusmão,  Sesta-ne’e, informa ba Prezidente Repúblika, José Ramos-Horta, katak hahú husi loron 01 fulan-Outubru 2026, Governu sei haruka ona Orsamentu Jerál Estadu (OJE) 2027 nian ba Parlamentu Nasionál atu halo diskusaun.

“Ha’u dehan hela ba Prezidente Repúblika, ha’u agora mai tiha ona, okupadu loro-loron nian, sei okupasaun Ministériu Finansas, tanba iha loron 01 fulan-Outubru, tenke haruka ona Orsamentu Jerál Estadu 2027 nian ba Parlamentu Nasionál atu halo diskusaun. Sorti ita manan tiha Lighthouse ona, tanba la’e, ha’u dala ruma semana ida nia laran ha’u iha Tribunál iha Vitória atu responde ba,” Xanana Gusmão, haktuir ba jornalista sira iha Palasiu prezidensiál.

Xefe Ezekutivu ne’e hatete problema bainhira temi orsamentu ne’e sempre difisil uitoan, difisil liu fali Lighthouse. Difisil ne’e katak, fó prióridade ba ida ne’e, ikus fali mai hotu-hotu dehan ninian ne’e mós prióridade.

Tamba ne´e ohin ko’alia ho Prezidente Repúblika, fó hatene, maibé nafatin informa katak iha fulan ida-ne´e too nia rohan Governu kontinua halo ezersisiu sira ba Orsamentu. Maibé, orsamentu 2027 prióridade mak eleisaun prezidensiais, eleisaun munisipais no mós ASEAN nia preparasaun, buat ruma ne’ebé tenke halo iha 2027-2028 atu hotu-hotu tiha, 2029 ita bele asume. No mós CPLP nian ne’ebé dala ruma sei kaer to’o iha Dezembru tinan ida ne’e.

PM Xanana Gusmão afirma, iha tinan 2027 livre uitoan ona, fó fali ba rai seluk, mais ASEAN nian sei sai nafatin prióridade boot ida ba Timor-Leste.

Jornalista: Cristina Ximenes