Governu Halo Preparativu sira Kona-bá Eventu Dili International Marathon no Konferénsia Internasionál Prémiadu Nobel da Pas

Vise-PM Francisco Kalbuadi Lay hamutuk ho entidade sira ne'ebé hola parte iha komisaun organizadora relata ba PR Ramos-Horta kona-bá preparativu sira ba atividade Dili International Marathon ho Konferensia Internasionál prémiadu Nobel da Pas.

Díli, 13 Jullu 2026 (RAFA.TL)- Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay ne’ebé lidera komisaun organizadora ba Díli International Marathon  no Konferensia Internasionál prémiadu Nobel da Pas, Segunda-ne’e, informa ba Prezidente Repúblika (PR), José Ramos-Horta  kona-ba preparative sira ba eventu internasionál importante sira ne’ebé sei realiza iha fulan-Agostu, tinan ne’e.

Eventu Dili International Marthon  no konferénsia Internasionál prémiadu Nobel  da Pas sei hahú uluk ho Horta Show iha loron 04 fulan-Agostu, kontinua ho semana verde ne’ebé sei selebra iha loron 08 fulan-Agostu, no kontinua ho Dili International Marathon ne´ebé sei partisipa husi atleta nasionál sira no internasionál hamutuk na´in-68 .

Vise-Primeiru-Ministru Francisco Kalbuadi Lay ba jornalista sira iha Palasiu Prezidensiál, ekipa preparasaun  hetan apoiu di’ak tebetebes husi Primeiru-Ministru ho Prezidente Repúblika prontu fó susesu ba atividade sira ne´e.

“Ami nia reuniaun ohin halo ona briefing ba iha Prezidente Repúblika, José Ramos-Horta hetan orientasaun lubuk ida husi Prezidente Repúblika. Ami sente katak ami prontu, ami apelu no husu ba Sekretáriu Estadu Komunikasaun Sosiál bele hamutuk ho ita-boot sira hotu bele halo kobertura ida-ne’e didi’ak hahú husi antes to’o depois, nune’e ita atu tau Timor iha mapa mundu nia klaran. Ida-ne’e mak orientasaun husi Prezidente Repúblika nian, presiza tebe-tebes ita boot sira hotu-hotu nia ajuda kobertura,” Francisco Kalbuadi Lay hateten.

Nia  agradese ba Xefe Kaza Sivil Prezidénsia Repúblika ho ekipa tomak, no mós ba inter-ministeriál ne’ebé envolve direitamente mai iha fulan-Agostu iha atividade haat ne’ebé  importante tebe-tebes, nune’e lori Timor  ba mundu no lori mundu mai iha Timor.

Francisco Kalbuadi Lay informa Prezidente Repúblika liu husi nia kontaktu rasik iha Nobel da Pas na’in-rua ne’ebé mak sei mai atu partilla ho sosiedade Timorense no akademista sira kona-ba saida mak sira hetan relativamente ho área ne’ebé premiadu sira sei partilla.

Vise-Primeiru-Ministru Francisco Kalbuadi Lay subliña ema internasionál lubuk ida, liu-liu estudante sira bele envolve tanba ne’e mak envolve minsiteriu lubuk ida, atu nune´e, bele hetan partisipasaun másimu husi sosiedade akademiku sira hotu no bele iha influensia direita ba sosiedade em-jeral no partisipalmente Timor-Leste.

Jornalista: Remigia Locatelli/Editór: Vito Salvadór