Governu Halo Despezu Administrativu Ba Abitante Uma-Kain 50 iha Postu Penal-Aimutin

Governu halo despezu administrativu ba abitante um-kain 50 iha Postu Penal-Aimutin, Díl, 12 Maiu 2026.

Díli, 12 Maiu 2026 (RAFA.tl)- Governu liu husi Sekretáriu Estadu Terras no Propriedade (SETP) hamutuk ho Autoridade Munisípiu Díli no Polísia Nasionál Timor-Leste (PNTL) halo despezu administrativu ba abitante uma-kain 50 ne’ebé okupa rai Estadu iha Aldeia Postu Penal, Suku Comoro, Postu-Administrativu Dom Aleixo, Munisípiu Díli.

Ekipa DNTP ho PNTL, Tersa (12/05/2026), ezekuta desizaun Tribunál hodi hasai obrigatóriu abitante uma-kain 50  iha Aldeia Postu Penal-Aimutin, Suku Comoro. Tuir observasaun Rafa.tl iha terenu nota, katak ekipa integradu ne’ebé kompostu husi SETP liu husi DNTP hamutuk ho PNTL no Autoridade Munisípiu Díli dadeer deit, tuku 08:00  Otl, ho ekipamentu pezadu halo ona despezu administrativu ba abitante uma-kain 50 no husu ho obrigatoriamente atu hamamuk fatin ne’e tanba antes ne’e fó ona notifikasaun no despaixu ne’ebé mai husi Tribunál.

Situasaun ne’e halo okupante sira sente lamentável, nune’e halo mós reasaun hasoru autoridade seguransa no entidade governativa ne’ebé marka prezensa hanesan Sekretáriu Estadu Terras no Propriedade (SETP), Jaime Xavier hodi husu atu fó uluk indemnizasaun molok halo despezu, maibé autoridade sira kontinua halo despezu bazeia ba orientasaun no karta husi Tribunál.

Familia afetadu, António Pinto haktuir katak dadeer deit Autoriedade Jestaun Munisípiu Díli, hamutuk ho SETP  no Polísia Eskuadra Dom Aleixo halo blokeia Estrada Diresaun husi Elemloi ba iha Bairru-Pité, hafoin lori ekipamementu sobu ho obrigatoriu komunidade nia uma ho ai-horis sira.

“Uluk karta ne’e mai, ami resposta sira nia karta ne’e, to’o ami atu ba hasoru sira iha ne’ebá laiha tempu ami hasoru dala ida ho Diretór DNTP momentu ne’ebe laiha solusaun, ami fila mai foin ateru de’it iha ne’e, DNTP halo karta notifikasaun mai, ami halo rekursu ba to’o iha DNTP solusaun ikus mak sira resposta ami nia karta mai ami nen ami atu haré, depois ami nia Xefe Aldeia ho Xefe suku mós la fo informasaun atu tama mai dudu ka hasai, ohin, sira tama ho obrigatoriu tenki hamamuk fatin,” António Pinto, informa ba jornalista sira.

Nia esplika iha Diretór balun iha DNTP sai fali sasin ba kompañia balun katak rai ne’e partensia ba kompañia, maibe komunidade sira ejije aprezenta evidénsia karta desizaun Tribunal Rekursu nian, maibé parte sira dehan labale.

“Ami lori malu ba iha tribunál ami manan, ami konta tuir buat ne’ebé ami nia uma iha laran, plantasaun ne’ebé iha, hodi ida ne’e mak sai evidénsia, entaun iha lei ne’ebá hatete ami iha diretu atu hela iha ne’e. Despaixu Tribunál Rekursu nian fó tiha ona mai, maibé sira dehan labale nafatin, kona-bá negosiasaun ho ami ne’e nunka, laiha halo negosiasaun atu halo indemizasaun ne’e laiha,” Tiago Pinto, abitenta ne’ebé afetadu husi despezu administrative Tribunál nian ne’e hateten.

Iha fatin hanesan, afetadu Imaculado Cabral, hatete durante ne’e sira ba iha tribunál hasoru malu ho kompañia Leader ho Lita store laiha solusaun.

“Ami hela iha ne’e tinan naruk ne’e mak ai-horis sira ne’e iha to’o nia hun mós boot hanesan ne’e, durante ne’e ami lao ba tribunál ne’e hasoru Leader ho Lita Store mak iha ne’eba, ikus mai mosu dehan  rai Estadu nian, sira mosu mai la iha  nogosiasaun ida  no la trata ninia povu ho di’ak.” hateten Imaculado Cabral.

Koordenador Rede ba Rai, Pedrito Vieira hateten halo solidaridade hodi apoiu familia afetadu sira no  konsidera Polísia nia asaun hasoru  komunidade afetadu sira ne’e krime kontra diretu humanus.

“ida ne’e krime tanba sira mai kaer ema ne’ebé los, ema ne’ebé atu ko’alia sai sira nia diretu  ba rai ida-ne’e, maibé Polísia mai kaptura hanesan ema kriminozu ida, agora ema nain ne’e mak kaer ona, kaer mos ha’u, la kleur husik fali ha’u. Ne’ebé ita nia maluk na’in-neen sira kaer detein iha Polísia ne’e diak liu husik agora kedas. Hanoin lisaun bo’ot ida ba ita nia estadu RDTL,”  Pedrito Viera hateten.

Jornalista : João Carlos/Editór: Vito Salvadór