Governu Hahú Prepara Diploma Ministérial Re-Teste Ba Kadete 12,851 Hodi Priense Vaga 400 iha PNTL

Ministru Interiór, Francisco da Costa Guterres. Imajen/Rafa.tl

Díli, 22 Abríl 2026 (RAFA.tl)- Ministru Interiór (MI), Francisco da Costa Guterres hatete Governu prepara hela rekizitu rekrutamentu ne’ebé sei produz ba diploma Ministérial molok halo re-teste ba kadete 12,851 hodi priense vaga 400 ne’ebé prevé ona ba Polísia Nasionál Timor-Leste (PNTL).

Lee Mós: PNTL Sei Halo Rekrutamentu Foun Hodi Troka Membru Sira Ne’ebé Tama Ona Idade Reforma

“Rekurtamentu nafatin 400, la aumenta, hein lai avansa nafatin 400 hodi rezolve problema ne’e tiha lai pois mak sei loke tan,” Ministru Francisco da Costa Guterres, informa  ba Jornalista sira iha Palásiu Governu, Kuarta (22/04/2026).

Ministru Francisco da Costa Guterres  esplika kona-bá orsamentu la presiza barak ona, maibé presiza de’it mak psiko-teste ho teste saúde,  enkuantu teste prova kultural, sei servisu hamutuk ho Komisaun Funsaun  Públika (CFP) prepara sasán sira ne’e hotu ne’ebé uza hodi atu halo teste ne’ebé sei laiha kustu barak.

Rezolusaun ne’ebé fó sai ona katak mantein sira ne’ebé mak liu tiha ona prova dokumentu hamutuk 12,581, sira ne’e mak sei tuir fali ba teste no agora aplika eliminatoriu kedas.

Komisaun ne’ebé atu halo teste ba kadete PNTL foun ne’e foun hotu hahú ho juri foun enkuantu komisaun suprevizaun monitorizasaun  sei presiza sira balun hodi hola parte tanba balun iha esperiénsia.

Komisaun fiskalizasaun no monitorizasaun ne’e presiza sira balun hodi kontinua tanba sira iha esperiénsia sira mak konsege hatene no detekta buat barak entaun  sira kontinua tau matan hodi akompaña nune’e prosessu la’o ho di’ak.

“Enkuantu juri no Sekretáriu troka totalmente hodi tau fali foun, Sekretariadu ida sei mai husi Austrália husu mós apóiu husi Austrália no Portugal hola parte iha prosesu ne’e hotu,”  nia hateten.

Ministru Interiór hatutan Sekretariadu ba rekrutamentu Polísia Nasionál Timor-Leste (PNTL) foun ne’e sei entrega ba komandu hodi lidera, juri mak sei iha faze diskusaun, maibé preferensia ne’e sei bele fó mós ba Polisía.

Jornalista: Elio dos Santos/Editór: Vito Salvadór