Governu Hahú Diskuti Esbosu Lei IVA

Governu Timor-Leste diskuti lei Impostu Valor Akresentadu (IVA), Kuarta 23 Setembru 2026.

Díli, 23 Setembru 2026 (RAFA) –Ministeriu Finansa liu husi Vise-Ministra Finansa Regina de Jesus Sousa, Kuarta ne’e, aprezenta lei Impostu Valor Akresentadu (IVA)  antes  implementa iha Timor Leste.

Aprezentasaun ne’e realiza liu husi semináriu iha Ministériu Finansa ho objetivu atu hetan orientasaun no kontribuisaun husi membru Governu antes esbosu lei ne’e lori ba Parlamentu Nasionál.

Vise-Ministra Finansa Regina de Jesus Sousa esplika kona-bá konseitu no preparasaun ba implementasaun Lei IVA. Tanba, IVA ne’e parte husi esforsu Governu atu alarga baze tributária, mellora administrasaun tributária, no responde ba mudansa iha reseita aduaneira.

“Prosesu tomak IVA ohin loron, ami mai fali halo aprezentasaun ida ba membru Governu tomak. Tanba ne’e ami presiza orientasaun no melloramentu hodi bele kontinua kompleta esbosu Lei IVA ne’e no kontinua lori ba Parlamentu Nasionál,” Vise-Ministra Finansa ne’e hateten.

Iha fatin hanesan Komisáriu Autoridade Tributária, Nicodemos dos Reis Pereira afirma katak preparasaun ba IVA hahú ona dezde tinan 2023, ho apoiu husi parseiru dezenvolvimentu sira.

Nia hatutan kona ba preparasaun ne’e inklui esbosu lei, no mós preparasaun téknika no operasionál atu suporta implementasaun IVA iha Timor-Leste.

“Esbosu lei IVA  ne’e iha faze final ona. Ohin, ita bolu membru Governu sira hodi partilla konseitu jerál, planu no introdusaun Lei IVA nian, no fó biban ba sira atu fó komentáriu no imput, hodi hetan diresaun kona-ba politika atu avansa lei ne’e,” Nicodemos dos Reis Pereira subliña.

Tuir Komisáriu Autoridade Tributária katak IVA sei la aplika ba produtu hotu-hotu. Tanba, produtu sira ne’ebé konsidera importante ba povu vulnerável, liuliu sidadaun ho rendimentu kiik, sei konsidera ho medida espesífika atu hamenus impaktu ba sira.

Governu sei kontinua halo preparasaun no konsulta antes esbosu Lei IVA ne’e finaliza no lori ba Parlamentu Nasionál.

Lei IVA ne’e sei la aplika ba iha produtu hotu-hotu,husi Ministeriu Finansa hetan ona orientasaun husi Primeiru Ministru Kay Rala Xanana Gusmão.

Nia mós haktuir Ministra Finansa rasik relata katak ba produtu sira ne’ebé maka sei afeta ba povu vulneravel sira no povu ne’ebé maka ho rendimentu kiik Lei IVA refere sei la aplika ba sira. Tanba ne’e, implementasaun IVA sei envolve mudansa iha sistema tributária, ho atensaun ba proteksaun konsumidór sira, liuliu família ho rendimentu kiik.

Jornalista : Remigia Locatelli