Governu Estabelese Taxa Ba Aktu no Servisu Administrasaun Públika Relasiona Ho Veíkulu Motorizadu no Kondutór Sira

Reuniaun Konsellu Ministru, Kuarta (22/04/2026). Foto:gov.tl

Díli, 22 Abríl 2026 (RAFA.tl)- Konsellu Ministrus aprova ona projetu Dekretu-Lei, ne’ebé aprezenta hosi Ministru Transportes no Komunikasoins, Miguel Marques Gonçalves Manetelu, ne’ebé ho objetivu atu estabelese taxa ne’ebé tenke selu ba aktu no servisu Administrasaun Públika nian relasiona ho veíkulu motorizadu no nia kondutór sira.

Iha komunikadu ofisiál ne’ebé Rafa.tl asesa Kuarta (22/04/2026) hatete, diploma ne’e define no klarifika rejime taxa ne’ebé aplika ba aktu no servisu ne’ebé Administrasaun Públika presta iha setór rodoviáriu, atu nune’e, bele garante korrespondénsia entre servisu ne’ebé presta no ninia kustu ida-idak.

Diploma ne’e, entre sira seluk, inklui prosedimentu relasionadu ho matríkula, rejistu, inspesaun veíkulu, emisaun títulu no lisensa sira, no mós ezame no dokumentu sira ne’ebé relasiona ho kondusaun.

Dekretu-Lei ne’e estabelese mós regras kona-bá kobransa taxa, identifikasaun ba sujeitu pasivu sira (ema ka instituisaun ne’ebé iha obrigasaun selu taxa) no posibilidade ba kobransa ne’ebé hala’o hosi entidade terseira parte sira, tuir termu sira ne’ebé define legalmente, hodi revoga rejime anteriór no prevé nia entrada iha vigór loron 30 hafoin nia publikasaun.

Jornalista: Elio dos Santos/Editór: Vito Salvadór